टोकियो, जापान ।
जापानी अन्वेषकहरूको टोलीले प्राणघातक एचआईची एड्सको औषधि सफल रुपमा परिक्षण गरेको दाबी गरेका छन् ।
आफूले विकास गरिरहेको खोपले बाँदरमा एड्स निम्त्याउने भाइरस एचआईभीलाई सफलतापूर्वक निर्मूल पारेको वैज्ञानिकहरुले बताएका छन् ।
जापानको नेशनल इन्स्टिच्युट अफ बायोमेडिकल इनोभेसन, हेल्थ एन्ड न्यूट्रिशनका अन्वेषकहरूले साइनोमोल्गस बाँदरमा प्रशोधित एचआईभी भाइरस इन्जेक्सन गरेका थिए । जसलाई क्र्याब इटिंग मकाकहरू पनि भनिन्छ, जुन नयाँ खोपको साथ लगाएका थिए ।
सुरुमा परीक्षण गरिएका सातमध्ये चार बाँदरमा एचआईभी सङ्क्रमण पाईएको थियो । तर खोप लगाएपछि उनीहरुको शरीरमा भाइरस पत्ता नलागेको अन्वेषकहरुले बताएका छन् । खोपले उत्तेजित बाँदरको इम्युनो रेस्पोन्सले उनीहरूमा एचआईभी हराएको अनुसन्धानकर्ताहरूले अनुमान गरेका छन् । अन्वेषकहरुले करिब पाँच वर्ष भित्रमा मानिसहरूमा एचआईभि बिरुद्धको क्लिनिकल परीक्षणहरू सुरु गर्ने आशा राखेका छन् ।
संस्थानको सुकुबा प्राइमेट रिसर्च सेन्टरका निर्देशक यासुतोमी यासुहिरो भन्छन् 'तिनीहरूको खोजले एड्सको पूर्ण निको पार्न सक्छ, जुन गाह्रो थियो, र त्यो सफलताले औषधि र खोपको विकासलाई अझ बढावा दिन सक्छ ।'
एड्स, वा एक्वायर्ड इम्युनोडेफिशियन्सी सिन्ड्रोमले विभिन्न प्रकारका जटिलताहरू निम्त्याउँछ । जापानमा २०,००० भन्दा बढी व्यक्तिहरू हाल एचआईभी एड्सबाट संक्रमित रहेको यहाँको सरकारी तथ्यांकमा उल्लेख छ ।
