टोकियो, जापान ।

जापानको ओकिनावा प्रान्तस्थित साकिशिमा टापुहरूतर्फ शक्तिशाली आँधी ‘चाम्पी’ शुक्रबारदेखि शनिबारसम्म नजिकिने अनुमान गरिएको छ । जापान मौसम विज्ञान एजेन्सीले तीव्र हावाहुरी, भारी वर्षा, समुद्री छाल र पहिरोको जोखिमप्रति सतर्क रहन आग्रह गरेको छ ।

बिहीबार बिहान आँधीको केन्द्रमा वायुदाब ९०५ हेक्टोपास्कल र हावाको अधिकतम गति १९८ किलोमिटर प्रतिघण्टा मापन गरिएको थियो । हावाको झोक्का २८८ किलोमिटर प्रतिघण्टासम्म पुग्न सक्ने जनाइएको छ ।

साकिशिमा क्षेत्रमा शुक्रबारदेखि शनिबारसम्म समुद्री छाल ११ मिटरसम्म अग्लो हुन सक्ने अनुमान छ । शनिबार बिहानसम्मको २४ घण्टामा ३०० मिलिमिटरसम्म वर्षा हुन सक्ने चेतावनी पनि दिइएको छ ।

मौसम अधिकारीहरूले तल्लो भूभागमा बाढी, नदीमा पानीको सतह बढ्ने र पहिरो जान सक्ने भन्दै स्थानीय बासिन्दालाई आवश्यक तयारी गर्न आग्रह गरेका छन् ।

आँधीले पछि दिशा परिवर्तन गरी उत्तरपूर्वतर्फ यात्रा गर्न सक्ने र पश्चिमी जापानमा समेत प्रभाव पार्न सक्ने सम्भावना छ । यसको मार्ग निश्चित नभएकाले पछिल्लो मौसम सूचना नियमित रूपमा हेर्न आग्रह गरिएको छ ।