टोकियो, जापान ।

जापानको पूर्वी भागमा रहेको कान्तो क्षेत्रसहित प्रशान्त महासागरको तटीय क्षेत्रमा शक्तिशाली आँधी ‘दुजुआन’ सोमबारदेखि मंगलबारसम्म पुग्ने सम्भावना रहेको जापानको मौसम विज्ञान एजेन्सीले जनाएको छ ।

आइतबार बिहान ९ बजेसम्म आँधी जापानको दक्षिणी समुद्री क्षेत्रमा प्रतिघण्टा १० किलोमिटरको गतिमा उत्तरपश्चिमतर्फ अघि बढिरहेको छ । आँधीको केन्द्रमा वायुदाब ९७० हेक्टोपास्कल, अधिकतम हावाको गति १२६ किलोमिटर प्रतिघण्टा र झोक्कासहितको गति १८० किलोमिटर प्रतिघण्टासम्म रहेको छ ।

मौसम अधिकारीका अनुसार सोमबारदेखि आँधीले दिशा परिवर्तन गर्दै उत्तरपूर्वतर्फ अघि बढ्नेछ । मंगलबारसम्म आफ्नो शक्ति कायम राख्दै इजु द्वीपसमूह तथा टोकियोसहित कान्तो क्षेत्रका प्रशान्त तटीय भाग नजिक पुग्ने अनुमान गरिएको छ ।

आँधी नजिकिनुअघि नै इजु द्वीपसमूह र पूर्वी जापानका प्रशान्त तटीय क्षेत्रमा भारी वर्षा हुन सक्ने चेतावनी दिइएको छ । लगातार वर्षाका कारण पहिरो, समथर क्षेत्रमा बाढी, नदीमा पानीको सतह बढ्ने तथा समुद्री छाल उच्च हुने जोखिम रहेको छ ।

इजु द्वीपसमूह र कान्तो क्षेत्रमा सोमबार अझ शक्तिशाली हावाको झोक्का आउन सक्ने मौसम अधिकारीहरूले बताएका छन् । सहरी क्षेत्रमा सडक तथा भूमिगत संरचनामा पानी पस्न सक्ने भएकाले विशेष सतर्कता अपनाउन आग्रह गरिएको छ ।

जापानमा रहेका नेपाली समुदायले पनि आइतबार साँझ देखि मंगलबारसम्म मौसमको अवस्था र स्थानीय प्रशासनका चेतावनीहरूमा विशेष ध्यान दिनु उपयुक्त हुनेछ ।