टोकियो, जापान ।

दक्षिण प्रशान्त महासागरस्थित भानुआतुका द्वीपहरूमा ज्वालामुखी विस्फोट भएको जापानको मौसम विज्ञान एजेन्सीले जनाएको छ। विस्फोटपछि समुद्री सतहमा असामान्य परिवर्तन वा सुनामी उत्पन्न हुने सम्भावना छ कि छैन भन्ने विषयमा एजेन्सीले निगरानी र विश्लेषण गरिरहेको जनाएको छ ।

जापान मौषम एजेन्सीका अनुसार ज्वालामुखी विस्फोट समुद्रनजिकको क्षेत्रमा भएकाले यसको प्रभाव केवल स्थानीय ज्वालामुखी गतिविधिमा सीमित हुन्छ वा समुद्रमा ठूलो हलचल उत्पन्न गर्न सक्छ भन्ने विषय महत्वपूर्ण बनेको छ । विशेषगरी ज्वालामुखी विस्फोटका क्रममा समुद्रभित्रको भूभाग अचानक विस्थापित भएमा सुनामीको जोखिम उत्पन्न हुन सक्ने भएकाले जापानी अधिकारीहरूले समुद्री सतहको अवस्था र सम्बन्धित भूकम्पीय गतिविधिलाई पनि ध्यानपूर्वक अध्ययन गरिरहेको बताएका छन् ।

हालसम्म प्राप्त सूचनाका आधारमा जापानमा सुनामी आएको वा ठूलो सुनामीको प्रभाव परेको पुष्टि भएको छैन । एजेन्सीले जोखिमको मूल्याङ्कन पूरा गरेपछि जापानतर्फ कुनै प्रभाव पर्ने सम्भावना भए थप सूचना जारी गर्ने अपेक्षा गरिएको छ ।

भानुआतु दक्षिण प्रशान्त क्षेत्रमा अवस्थित ज्वालामुखीय गतिविधिका लागि परिचित देश हो । यस क्षेत्रमा सक्रिय ज्वालामुखीहरू रहेका छन् र विगतमा पनि ज्वालामुखी गतिविधि तथा भूकम्पका कारण समुद्री क्षेत्रमा जोखिम देखिँदै आएको छ । पछिल्लो समय पनि भानुआतु क्षेत्रमा भूकम्पीय गतिविधि र ज्वालामुखी गतिविधि निरन्तर निगरानीमा रहेको देखिन्छ ।

ज्वालामुखीबाट उत्पन्न सुनामीको जोखिम सामान्य भूकम्पबाट आउने सुनामीभन्दा केही फरक हुन सक्छ । ठूलो विस्फोट, ज्वालामुखीको भाग समुद्रमा खस्नु वा समुद्रभित्रको भू–भाग अचानक सर्नुजस्ता घटनाले छोटो समयमै ठूलो समुद्री छाल उत्पन्न गराउन सक्छन् । सन् २०२२ मा टोंगाको समुद्रमुनि रहेको हुङ्गा टोंगा–हुङ्गा हाआपाई ज्वालामुखी विस्फोटपछि प्रशान्त क्षेत्रमा ठूलो समुद्री हलचल देखिएको थियो र जापानमा समेत सुनामीसम्बन्धी चेतावनी जारी गरिएको थियो ।

जापानमा रहेका नेपालीका लागि अहिले नै आत्तिनुपर्ने अवस्था देखिएको छैन । तर समुद्र नजिकका क्षेत्रमा बसोबास वा यात्रा गरिरहेका व्यक्तिहरूले जापानको मौषम एजेन्सी तथा स्थानीय प्रशासनबाट जारी हुने आधिकारिक सूचना हेर्नु महत्वपूर्ण हुन्छ । विशेषगरी सुनामीसम्बन्धी चेतावनी वा सल्लाह जारी भएमा समुद्री किनार, बन्दरगाह र तल्लो भूभागबाट तत्काल टाढा जानुपर्ने हुन्छ ।

एजेन्सीले जोखिमको मूल्याङ्कन जारी राखेकाले आगामी केही घण्टामा थप सूचना आउन सक्नेछ । जापानमा सुनामीसम्बन्धी कुनै चेतावनी वा सल्लाह जारी भए त्यसको जानकारी तत्काल सार्वजनिक गरिनेछ ।