टोकियो, जापान ।

जापानको पूर्वी समुद्री क्षेत्रमा रहेको ताइफु नम्बर १५ अगस्ट ११ तारिख मंगलबार सम्ममा तोहोकु तथा राजधानी टोकियो आसपास कान्तो–कोसिन क्षेत्रको निकै नजिक आइपुग्ने पूर्वानुमान गरिएको छ । ताइफु नजिकिँदै जाँदा विभिन्न क्षेत्रमा वर्षा र हावाको गति बढेर मौसम खराब हुन सक्ने भन्दै जापान मौसम विज्ञान एजेन्सीले नागरिकलाई उच्च सतर्कता अपनाउन आग्रह गरेको छ ।

जापानको मौसम विज्ञान एजेन्सीका अनुसार ताइफु नम्बर १५ हाल जापानको पूर्वी समुद्री क्षेत्रमा उत्तरपश्चिम दिशातर्फ अघि बढिरहेको छ । यसको प्रभावका कारण विशेषगरी तोहोकु क्षेत्रको प्रशान्त महासागरपट्टि मंगलबारदेखि तीव्र हावा चल्ने, समुद्रमा ठूलो छालसहित अत्यधिक खराब अवस्था सिर्जना हुने र भारी वर्षा हुने सम्भावना छ ।

तोहोकु क्षेत्रमा बढी प्रभावको सम्भावना

ताइफुको मार्गका कारण इवाते, मियागी, फुकुसिमा लगायत तोहोकुका प्रशान्त तटीय क्षेत्रमा हावाको गति तीव्र हुने र समुद्रमा ठूलो छाल उठ्ने जोखिम रहेको छ ।

समुद्री क्षेत्रमा यात्रा गर्नेहरूलाई विशेष सावधानी अपनाउन तथा मौसमको अवस्था बिग्रिएमा समुद्रतर्फ नजान आग्रह गरिएको छ । माछा मार्ने डुंगा तथा अन्य साना जलयानका लागि पनि जोखिम बढ्न सक्ने भएकाले सम्बन्धित निकायको निर्देशन पालना गर्न भनिएको छ।

टोकियो र आसपास कान्तो क्षेत्रमा पनि वर्षा र हावा बढ्ने

ताइफुको प्रभाव तोहोकुमा मात्र सीमित नहुने देखिएको छ । टोकियोसहित कान्तो क्षेत्र तथा कोसिन क्षेत्रमा पनि वर्षा र हावाको गति बढ्न सक्ने पूर्वानुमान गरिएको छ ।

विशेषगरी मंगलबार बिहानदेखि बेलुकासम्म कतिपय स्थानमा छोटो समयमा तीव्र वर्षा हुन सक्ने भएकाले सडकमा पानी जम्ने, नदीको जलस्तर बढ्ने तथा पहिरोको जोखिम बढ्न सक्ने चेतावनी दिइएको छ ।

निगाता प्रिफेक्चरमा समेत वर्षा र हावा तीव्र हुने सम्भावना रहेको मौसम अधिकारीहरूले बताएका छन् ।

ओबोन बिदाका कारण यात्रा गर्नेहरूलाई विशेष सावधानी

अहिले जापानमा ओबोन बिदाको समय पनि भएकाले धेरै मानिस लामो दूरीको यात्रा तथा घर फर्किने क्रममा छन् । ताइफुको प्रभावका कारण रेल, विमान तथा सडक यातायातमा ढिलाइ, रद्द वा मार्ग परिवर्तन हुन सक्ने सम्भावना छ ।

त्यसैले मंगलबार यात्रा गर्नेहरूले घरबाट निस्कनुअघि सम्बन्धित रेलवे कम्पनी, एयरलाइन्स तथा सडक यातायातको पछिल्लो सूचना जाँच गर्न मौसम अधिकारीहरूले सुझाव दिएका छन् ।

विशेषगरी तटीय क्षेत्रमा जाने, पहाडी क्षेत्रमा घुम्न जाने वा नदी तथा समुद्र नजिकका स्थानमा बस्नेहरूले मौसम बिग्रिएको अवस्थामा अनावश्यक यात्रा नगर्नु सुरक्षित मानिन्छ ।

जापानमा रहेका नेपालीलाई पनि सतर्क रहन आग्रह

टोकियो, चिबा, साइतामा, खानागावा, इबाराकी तथा तोहोकु क्षेत्रमा बसोबास गर्ने नेपालीहरूले पनि मंगलबारको मौसमबारे विशेष ध्यान दिन आवश्यक छ ।

जापानमा रहेका नेपालीहरूले स्थानीय नगरपालिकाबाट जारी हुने आपत्कालीन सूचनाको मौसम चेतावनी तथा विश्वसनीय सञ्चारमाध्यमबाट प्राप्त पछिल्लो जानकारी नियमित रूपमा हेर्नु उचित हुन्छ ।

घरबाहिर निस्कन आवश्यक भए छाता वा वर्षाबाट बच्ने सामग्री मात्र होइन, तीव्र हावाको अवस्थामा उड्न सक्ने वस्तुहरू घरको बाल्कोनी तथा बाहिरी स्थानबाट सुरक्षित राख्नु पनि महत्वपूर्ण हुन्छ।

मौसम विज्ञान एजेन्सीले ताइफुको मार्ग र यसको शक्तिमा परिवर्तन हुन सक्ने भएकाले अहिलेको पूर्वानुमानलाई अन्तिम नठान्न र नयाँ मौसम सूचना तथा चेतावनीहरू निरन्तर जाँच गर्न आग्रह गरेको छ ।