एजेन्सी ।

ईजरायलले इरानमाथि बलजफ्तीपूर्ण हमला गरेपछि जारी इरान इजरायल युद्धमा चीनले तत्काल तनाव कम गर्न भन्दै दुवै देशलाई आक्रमण रोक्न आग्रह गरेको छ ।

ईजरायली धावाको जवाफमा तेहरानले इजरायली सहरहरूमा मिसाइल वर्षा गरेपछि चीनले दुबै देशलाई तनाव कम गर्न ‘तुरुन्तै’ कदम चाल्न आग्रह गरेको हो ।

‘हामी सबै पक्षलाई तुरुन्तै तनाव घटाउने उपायहरू अपनाउन, क्षेत्रलाई ठूलो अशान्तिमा डुब्नबाट रोक्न र वार्तालापमार्फत समस्या समाधानको सही बाटोमा फर्कने अवस्था सिर्जना गर्न आग्रह गर्छौं’, चिनियाँ विदेश मन्त्रालयका प्रवक्ता गुओ जियाकुनले भने।

दशकौँको शत्रुता र प्रोक्सी तथा गुप्त अपरेसनहरूमार्फत लडिएको लामो छायाँ युद्धपछि गत हप्ता इजरायलको इरानमाथिको अचानक आक्रमणले अहिलेसम्मकै तीव्र लडाइँ सुरु गरेको छ र लामो द्वन्द्वको डर जगाएको छ। यो द्वन्द्वले मध्यपूर्वलाई समेट्न सक्छ।

इजरायलले आफ्नो आक्रमणले सैन्य र आणविक सुविधाहरूमा प्रहार गरेको र धेरै शीर्ष इरानी कमान्डर र आणविक वैज्ञानिकहरू मारिएको बताएको छ। यद्यपि एक वरिष्ठ अमेरिकी अधिकारीले आइतबार अमेरिकी राष्ट्रपति डोनाल्ड ट्रम्पले इजरायललाई सर्वोच्च नेता आयातुल्लाह अली खामेनीलाई मार्ने योजनाबाट पछि हट्न भनेको बताए।

चीनका शीर्ष कूटनीतिज्ञ एवं विदेशमन्त्री वाङ यीले शनिबार आफ्ना इजरायली र इरानी समकक्षीहरूसँग गरेको फोनवार्तामा उनले दुवैलाई तेहरानप्रति बेइजिङको समर्थन स्पष्ट पारेको विदेश मन्त्रालयले बताएको छ।

इरानसँग चीनको घनिष्ठ सम्बन्ध छ। चीन इरानको सबैभन्दा ठूलो व्यापारिक साझेदार र यसको तेलको मुख्य खरिदकर्ता हो भने तेहरान अझै पनि कडा अमेरिकी प्रतिबन्धमा छ।

‘सबै सम्बन्धित पक्षहरूले तुरुन्तै ब्रेक लगाउन र तनाव कम गर्न कदम चाल्नुपर्छ’, गुओले सोमबार भने, ‘बलले दिगो शान्ति ल्याउन सक्दैन। चीनले यस क्षेत्रमा थप अशान्ति रोक्न सम्बन्धित पक्षहरूसँग सञ्चार जारी राख्नेछ, शान्ति प्रवर्द्धन गर्नेछ र वार्तालाई प्रोत्साहन दिनेछ।’