टोकियो, जापान ।

जापानी प्रधानमन्त्री सानाए ताकाइची र अमेरिकी राष्ट्रपति डोनाल्ड ट्रम्पबीच आगामी मंगलबार अमेरिकाको न्यूयोर्कमा भेटवार्ता हुने भएको छ । संयुक्त राष्ट्रसंघको महासभामा सहभागी हुन ताकाइची अमेरिकाको भ्रमणमा जाने कार्यक्रमसँगै दुई नेताबीच भेटवार्ताको तयारी अघि बढाइएको जापानी अधिकारीहरुले बताएका छन् ।

जापानको विदेश मन्त्रालयका अनुसार प्रधानमन्त्री ताकाइचीले सेप्टेम्बर २१ देखि २४ सम्म न्यूयोर्क भ्रमण गर्नेछिन् । उनले संयुक्त राष्ट्रसंघको ८१औँ महासभाको सामान्य बहसमा सम्बोधन गर्ने कार्यक्रम छ ।

भेटवार्ता भएमा जापान–अमेरिका सम्बन्ध, राष्ट्रिय सुरक्षा, आर्थिक सुरक्षा तथा द्विपक्षीय गठबन्धन लगायतका विषयमा छलफल हुने अपेक्षा गरिएको छ । जापानले अमेरिकासँगको सुरक्षा सहकार्यको महत्त्व पनि पुनः जोड दिने तयारी गरेको छ ।

चीनसँगको सम्बन्धबारे पनि छलफल हुने

ताकाइचीले ट्रम्पसँगको भेटमा चीनसँग जापानको पछिल्लो सम्बन्ध र क्षेत्रीय सुरक्षाका विषयमा जापानको धारणा राख्ने अपेक्षा गरिएको छ । विशेषगरी ट्रम्प र चिनियाँ राष्ट्रपति सी चिनफिङबीच सेप्टेम्बर २४ मा हुने भनिएको शिखर वार्ताअघि जापानले वासिङ्टनसँग आफ्ना धारणा समन्वय गर्न खोजिरहेको बताइएको छ ।

टोकियो र बेइजिङबीच ताइवानसम्बन्धी विषयमा तनाव बढेपछि जापानले अमेरिकासँग क्षेत्रीय सुरक्षा र चीनसम्बन्धी नीतिमा आफ्नो दृष्टिकोण साझा गर्न खोजिरहेको छ ।

प्रधानमन्त्री ताकाइचीले सेप्टेम्बर २२ मा संयुक्त राष्ट्रसंघ महासभामा सम्बोधन गर्ने कार्यक्रम रहेको छ। सोही दिन ट्रम्पले पनि महासभामा सम्बोधन गर्ने तालिका छ।

जापान र अमेरिकाका दुई नेताबीचको यो भेट ट्रम्प–सी वार्ताभन्दा अगाडि हुन लागेकाले चीन, ताइवान, क्षेत्रीय सुरक्षा र आर्थिक सुरक्षासम्बन्धी विषयमा विशेष चासोका साथ हेरिएको छ।