एजेन्सी ।

इजरायलको संसदीय निर्वाचनको मतगणना सम्पन्न भए पनि कुनै पनि राजनीतिक गठबन्धन स्पष्ट बहुमत प्राप्त गर्न असफल भएको छ । प्रधानमन्त्री बेन्जामिन नेतान्याहूको सत्तारूढ गठबन्धन र विपक्षी दल दुवै बहुमतबाट टाढा रहेपछि नयाँ सरकार गठनका लागि राजनीतिक दलहरूबीच गठबन्धन वार्ता सुरु हुने भएको छ ।

बिहीबार इजरायलको केन्द्रीय निर्वाचन समितिले मंगलबार सम्पन्न निर्वाचनको अन्तिम मतगणना सार्वजनिक गरेको हो । इजरायली संसद् (नेसेट) का कुल १२० सिटमध्ये नेतान्याहूको दक्षिणपन्थी लिकुड पार्टीले २७ सिट जितेको छ । त्यस्तै, पूर्वसैनिक प्रमुख गादी आइजेनकोट नेतृत्वको विपक्षी मध्यमार्गी याशार पार्टीले २१ सिट प्राप्त गरेको छ ।

यस निर्वाचनमा दुई अरब राजनीतिक दलले उल्लेखनीय सफलता हासिल गरेका छन् । ती दलहरूले संयुक्त रूपमा १९ सिट जितेका छन्, जुन अघिल्लो निर्वाचनको तुलनामा झन्डै दोब्बर हो ।

इजरायलको कुल मतदातामध्ये करिब २० प्रतिशत हिस्सा ओगट्ने अरब समुदायको मतदान सहभागिता यसपटक बढेको बताइएको छ । प्यालेस्टाइनप्रति कठोर नीति अपनाउँदै आएको नेतान्याहू सरकारप्रतिको असन्तुष्टि उनीहरूको बढ्दो सहभागिताको एउटा प्रमुख कारण मानिएको छ ।

नेतान्याहूको सत्ता संकटमा

निर्वाचनमा सबैभन्दा धेरै सिट लिकुड पार्टीले जिते पनि सरकार गठनका लागि आवश्यक ६१ सिटको बहुमत जुटाउन सकेन । दक्षिणपन्थी तथा अतिदक्षिणपन्थी दलहरू सम्मिलित नेतान्याहू नेतृत्वको गठबन्धनले कुल ५३ सिट मात्रै प्राप्त गरेको छ ।

त्यस्तै, याशारसहित विपक्षी गठबन्धनको पक्षमा ४८ सिट आएको छ । यसले कुनै पनि पक्षले स्पष्ट जनादेश प्राप्त नगरेको देखाएको छ ।

अरब दलको भूमिका निर्णायक बन्न सक्ने

यस निर्वाचनपछि सबैभन्दा चासोको विषय अरब राजनीतिक दलहरूको भूमिका बनेको छ । संयुक्त रूपमा १९ सिट जितेका यी दलहरू सरकार गठनको समीकरणमा निर्णायक बन्न सक्ने सम्भावना छ ।

विशेषगरी गाजामा जारी युद्ध, प्यालेस्टाइनप्रतिको इजरायली नीति र अरब समुदायप्रतिको सरकारी व्यवहारलाई लिएर नेतान्याहू प्रशासनमाथि आलोचना भइरहेका बेला अरब दलहरूको चुनावी सफलतालाई राजनीतिक रूपमा अर्थपूर्ण मानिएको छ ।

अब निर्वाचन परिणाम औपचारिक रूपमा टुंगिएपछि इजरायलका राष्ट्रपतिले नयाँ सरकार गठन गर्न सक्ने सम्भावना भएका दलका नेतालाई सरकार गठनको जिम्मेवारी दिने प्रक्रिया अघि बढाउनेछन् ।

त्यसपछि विभिन्न दलबीच गठबन्धन निर्माणका लागि वार्ता हुनेछ । अरब दलहरू कुनै गठबन्धनमा सहभागी हुन्छन् वा बाहिरै बसेर सरकार गठनको समीकरणलाई प्रभावित गर्छन् भन्ने विषयले आगामी राजनीतिक दिशा निर्धारण गर्ने देखिन्छ ।

यो निर्वाचन नेतान्याहूका लागि सत्ता जोगाउने चुनौती बनेको छ भने विपक्षी दलहरूका लागि नयाँ राजनीतिक समीकरण निर्माण गर्ने अवसरका रूपमा देखिएको छ । विशेषगरी अरब दलहरूको बढ्दो प्रतिनिधित्वले प्यालेस्टाइन नीतिसहित इजरायलको आगामी राजनीतिक बहसमा प्रभाव पार्न सक्नेछ ।