.jpg)
एजेन्सी ।
२० महिनाअघि हमास समूहले इजरायलमा आक्रमण गरी अपहरण गरेका एक थाई नागरिकको इजरायली सेनाको बमबारिमा परि मृत्यु भएको छ ।
थाई नागरिक नातापोङ पिन्ताको शव भेटिएको इजरायली सेनाले बताएको छ। उनीसँगै हमासको नियन्त्रणमा रहेका नेपालका विपिन जोशीको अवस्था भने अझै अज्ञात छ ।
थाई नागरिक पिन्ताको शव दक्षिणी गाजाको राफह क्षेत्रमा भेटिएको इजरायलका रक्षामन्त्री इजरायल कट्जलाई उद्धृत गर्दै बीबीसीले जनाएको छ । ती थाई नागरिक कृषि मजदुरका रुपमा दक्षिणी इजरायलमा कार्यरत थिए। सात जना थाई नगरिक त्यसबेला अपहरणमा परेकोमा पाँच जनालाई हमासले ६ महिनाअघि रिहा गरेको थियो।
हमासले इजरायली बमबारिमा ती थाई नागरिकको मृत्यु भएको बताए पनि अपहरण गरिएको एक महिनाभित्रै उनको हत्या गरिएको हुनसक्ने आरोप इजरायली सैनिक अधिकारीले लगाएका छन् । यसअघि पनि गत सातामा इजरायली सेनाले इजरायली अमेरिकनको शव गाजामा भेटाएको थियो । उनको पनि इजरायली रकेट आक्रमणमा निधन भएको हमासले बताएको छ ।
७ अक्टोबर २०२३ मा हमास नेतृत्वको समूहले इजरायलमा आक्रमण गरी इजरायली सेनासहित विभिन्न देशका नागरिकलाई अपहरण गरेको थियो । त्यसरी अपहरण गरि बन्धक बनाइएकामध्ये केहीलाई रिहा गरिएकोमा कतिपयको शव भेटिएको थियो । नेपालका विपिन जोशी लगायत केहीको अवस्था अझै अज्ञात छ ।
२० महिनाअघि हमासले गरेको आक्रमणपछि इजरायलले प्यालेस्टाइन गाजा क्षेत्रमा ब्यापक हमला गरिरहेको छ । इजरायली नरसंहारमा परि गाजाका ५४ हजार भन्दा धेरै नागरिकले ज्यान गुमाइसकेका छन् ।
