एजेन्सी ।

गाजामा मच्चाएको नरसंहारमा इजरायलका प्रधानमन्त्री बेन्जामिन नेतान्याहुविरुद्ध पक्राउ पुर्जी जारी गरिएको छ ।

अन्तर्राष्ट्रिय फौजदारी अदालत (आईसीसी)ले बिहीबार युद्ध र मानवताविरुद्धको अपराधमा दोसी करार गर्दै नेतान्याहुमाथि पक्राउ पुर्जी जारी गरेको हो ।

नेतान्याहुबाहेक इजरायली पूर्वरक्षामन्त्री योभ गालान्ट र हमासका नेता मोहम्मद डिफविरुद्ध पनि पक्राउ पुर्जी जारी गरिएको छ । तर, रिपोर्टका अनुसार, इजरायलले डिफको यसअघि नै हत्या गरिसकेको छ ।

अदालतका मुख्य अभियोजक करिम खानले गत मे महिनामा पक्राउ पुर्जी जारी गर्न अनुरोध गरेका थिए । गाजामा ठूलो भोकमरीको कारण नेतान्याहु र गालान्ट दोषी रहेको उनको आरोप थियो ।

गत वर्षको अक्टोबर ७ मा हमास लडाकुहरूले इजरायलमा आक्रमण गरेका थिए । त्यसक्रममा एक हजारभन्दा धेरैको ज्यान गएको थियो भने २५० भन्दा बढी इजरायली अपहरणमा परेका थिए ।

जवाफी कारबाहीमा उत्रिएको इजरायलले अझै आक्रमण गरिरहेको छ । जसमा ४४ हजारभन्दा बढी प्यालेस्टाइनिको इजरायलले हत्या गरिसकेको छ् । एक लाखभन्दा बढी घाइते भएका छन् ।

यसैगरी लेबनानमा समेत गाजामा जस्तैगरि बमबारि र रकेट आक्रमण गरिरहेको इजरायलले ४ हजार भन्दा धेरैको ज्यान लिइसकेको छ ।

यि सब नरसंहारका बाबजुद अमेरिका, बेलायत, जर्मनी लगायत अधिकांश युरोपेली देशहरुले इजरायललाई हतियार उपलब्ध गराइरहेका छन । कतिसम्म भने अमेरिकाले राष्ट्रसंघमा युद्वबिराम प्रस्ताव समेत भिटो प्रयोग गरी पारीत हुन नदिएर इजरायलको नरसंहारमा साथ र सहयोग दिइरहेको छ ।