टोकियो, जापान ।

बढ्दो महँगीका कारण जापानी जनतामा असन्तुष्टि बढ्दै जाँदा प्रधानमन्त्री सानाए ताकाइची नेतृत्वको सरकारको लोकप्रियता उल्लेखनीय रूपमा घटेको नयाँ जनमत सर्वेक्षणले देखाएको छ ।

योमिउरी शिम्बुनले आइतबार सार्वजनिक गरेको सर्वेक्षण अनुसार जुलाई महिनामा ताकाइची सरकारको अनुमोदन ५७ प्रतिशतमा झरेको छ, जुन जुन महिनाको ६९ प्रतिशतको तुलनामा १२ प्रतिशत अंक कम हो । गत वर्ष प्रधानमन्त्री बनेयता उनको समर्थन दर पहिलो पटक ६० प्रतिशतभन्दा तल झरेको हो । 

सर्वेक्षणअनुसार सरकारप्रतिको अस्वीकृति पनि बढेर ३४ प्रतिशत पुगेको छ, जुन अघिल्लो महिनामा २१ प्रतिशत थियो ।

महँगी नियन्त्रणमा सरकार असफल भएको जनमत

सर्वेक्षणमा सहभागीमध्ये ७१ प्रतिशतले बढ्दो जीवनयापन खर्च नियन्त्रण गर्न सरकारले पर्याप्त काम गर्न नसकेको बताएका छन् । जुन महिनामा यस्तो धारणा राख्नेको संख्या ५६ प्रतिशत थियो।

बढ्दो महँगीको प्रभाव कम गर्न ताकाइचीले खाद्यान्नमा लाग्ने ८ प्रतिशत उपभोग कर घटाउने प्रतिबद्धता जनाएकी थिइन् । तर वित्तीय दबाब, बजारको प्रतिक्रिया तथा आफ्नै सत्तारुढ दलभित्रको मतभेदका कारण उक्त निर्णय अझै कार्यान्वयन हुन सकेको छैन ।

आर्थिक नीतिमाथि बढ्दो दबाब

ताकाइची सरकारको विस्तारमुखी वित्तीय तथा मौद्रिक नीतिका कारण जापानी सरकारी ऋणपत्र (बन्ड) को प्रतिफल बढेको तथा येनको विनिमय दर करिब चार दशकयताकै कमजोर स्तरमा पुगेको विश्लेषण गरिएको छ । यसले सरकारमाथि आर्थिक व्यवस्थापनलाई लिएर थप दबाब सिर्जना गरेको छ ।

मन्त्रिपरिषद् पुनर्गठनको सम्भावना

पछिल्ला अन्य जनमत सर्वेक्षणहरूले पनि ताकाइची सरकारको लोकप्रियता घट्दै गएको देखाएका छन् । स्थानीय सञ्चारमाध्यमहरूका अनुसार प्रधानमन्त्रीले अगस्ट वा सेप्टेम्बरमा मन्त्रिपरिषद् पुनर्गठन गर्ने सम्भावना रहेको छ ।

दाइवा सेक्युरिटिजका प्रमुख बजार अर्थशास्त्री केन्जी यामामोतोले ताकाइचीको समर्थन दर अघिल्ला सरकारहरूको तुलनामा अझै बलियो रहे पनि प्रतिनिधिसभा निर्वाचनमा प्राप्त राजनीतिक पूँजी क्रमशः घट्दै गएको बताएका छन् ।

उनका अनुसार आगामी मन्त्रिपरिषद् पुनर्गठनमार्फत प्रधानमन्त्रीले आफ्नो आर्थिक नीतिको आगामी दिशा स्पष्ट पार्ने अपेक्षा गरिएको छ ।

मुद्रास्फीति अझै चुनौती

उता बैंक अफ जापानले जुन महिनामा ब्याजदर बढाएर १ प्रतिशत पुर्‍याएको थियो, जुन पछिल्लो ३१ वर्षयताकै उच्च स्तर हो । यद्यपि सरकारी इन्धन अनुदानका कारण जुन महिनासम्म लगातार पाँचौं महिनासम्म मुख्य उपभोक्ता मुद्रास्फीति २ प्रतिशतभन्दा तल कायम रह्यो ।

तर उत्पादन लागत निरन्तर बढिरहेकाले वर्षको उत्तरार्धमा मुद्रास्फीति पुनः २ प्रतिशतभन्दा माथि पुग्ने विश्लेषकहरूको अनुमान छ ।