.jpg)
टोकियो, जापान ।
बैंक अफ जापानले आफ्नो प्रमुख नीतिगत ब्याजदर ०.२५ प्रतिशत बिन्दुले बढाएर १.२५ प्रतिशत पुर्याउने निर्णय गरेको छ । यो ब्याजदर करिब ३१ वर्षयताकै उच्च स्तर हो ।
केन्द्रीय बैंकले शुक्रबार सम्पन्न दुईदिने मौद्रिक नीति बैठकपछि ब्याजदर वृद्धिको घोषणा गरेको हो । यो पछिल्लो तीन महिनामा गरिएको पहिलो ब्याजदर वृद्धि हो ।
यससँगै बैंक अफ जापानले पछिल्लो समय ब्याजदर वृद्धि गर्ने गति पनि तीव्र बनाएको छ । यसअघि बैंकले करिब प्रत्येक छ महिनामा ब्याजदर बढाउँदै आएको थियो ।
जापानमा मूल्यवृद्धि तीव्र हुन सक्ने जोखिमलाई सम्बोधन गर्न ब्याजदर बढाउने संकेत बैंकले यसअघि नै दिएको थियो । सोहीअनुसार पछिल्लो निर्णय गरिएको हो ।
ब्याजदर वृद्धिबारे बैंक अफ जापानका गभर्नर उएदा काजुओले शुक्रबार नै पत्रकार सम्मेलनमार्फत थप जानकारी दिने भएका छन् । उनले निर्णयको कारण स्पष्ट पार्नुका साथै पत्रकारका प्रश्नको जवाफ दिनेछन् ।
ब्याजदर वृद्धिले जापानमा ऋण तथा बचतको ब्याज, घरायसी खर्च र व्यवसायिक लगानीमा समेत प्रभाव पार्न सक्ने अनुमान गरिएको छ ।
