जापानबाट साम्प्रदायिक प्रचार गरिरहेको आरोप लागेका अरुणकुमार मेहता साउन अन्तिम साता छुट्टीमा नेपाल फर्किएका थिए। घरायसी कामका लागि २०८३ भदौ ५ गते सुनसरीको इनरुवा बजार पुगेका बेला प्रहरीले उनलाई नियन्त्रणमा लिएको थियो। सोही दिन देवानगञ्ज–१ निवासी विवेककुमार मेहताले उनीविरुद्ध जिल्ला प्रहरी कार्यालय सुनसरीमा किटानी जाहेरी दर्ता गरेका थिए।

अदालतमा दिएको बयानमा मेहताले फेसबुक र टिकटकमा आफैँले भिडियो बनाएर अपलोड गरेको स्वीकार गरेका छन्। उनले जापानमा ज्याला मजदुरी गर्दै आएको र गाउँमा हिन्दु–मुस्लिम विवादका क्रममा आफ्ना आफन्त मारिएको भन्ने हल्ला सुनेपछि आक्रोशमा भिडियो बनाएर सामाजिक सञ्जालमा पोस्ट गरेको बताएका छन्। यद्यपि, धार्मिक विद्वेष फैलाउने वा समाजमा अशान्ति मच्चाउने आफ्नो उद्देश्य नरहेको उनको जिकिर छ।

यसैबीच, अदालतले मेहताको साथबाट बरामद भएको आईफोन १६ प्रो म्याक्स र सिमकार्ड मुद्दाको अन्तिम किनारा नलागेसम्म सुरक्षित राख्न आदेश दिएको छ। साथै, जाहेरीवाला तथा घटनासँग सम्बन्धित व्यक्तिहरूलाई आगामी सुनुवाइमा उपस्थित गराई बकपत्र गराउन पनि निर्देशन दिइएको छ। मुद्दाको थप कानुनी प्रक्रिया जारी रहेको छ।