टोकियो, जापान ।

जापानमा सन् २०२५ मा पुरुष र महिलादुवैको औसत आयु बढेको छ । जापानको स्वास्थ्य, श्रम तथा कल्याण मन्त्रालयले शुक्रबार सार्वजनिक गरेको सर्वेक्षण अनुसार क्यान्सर, मुटुरोग तथा कोभिड-१९ बाट हुने मृत्युमा कमी आएपछि औसत आयुमा सुधार देखिएको हो ।

सर्वेक्षण अनुसार सन् २०२५ मा जापानी पुरुषको औसत आयु ८१.३५ वर्ष पुगेको छ, जुन अघिल्लो वर्षको तुलनामा ०.२५ वर्ष बढी हो । त्यस्तै महिलाको औसत आयु ८७.३३ वर्ष पुगेको छ, जुन ०.२० वर्षले वृद्धि भएको हो ।

औसत आयुले कुनै निश्चित वर्षमा जन्मिएका शिशुले हालको मृत्युदर यथावत् रहेमा औसतमा कति वर्ष बाँच्ने अपेक्षा गरिन्छ भन्ने देखाउँछ ।

कोभिड–१९ महामारीका कारण जापानको औसत आयु सन् २०२१ र २०२२ मा घटेको थियो । त्यसपछि कोभिडबाट हुने मृत्यु कम भएसँगै २०२३ मा पुनः सुधार भएको थियो भने २०२४ मा लगभग स्थिर रहेको तथ्यांकले देखाएको छ ।

विश्वका अन्य मुलुकसँग तुलना गर्दा महिलाको औसत आयुमा जापान पहिलो स्थानमा रहेको छ । पुरुषको औसत आयु भने स्विडेन, स्विट्जरल्यान्ड, इटाली लगायतका देशपछि सातौं स्थानमा रहेको मन्त्रालयले जनाएको छ ।

हालको मृत्युदर यथावत् रहने हो भने जापानका ७६ प्रतिशत पुरुष र ८८.१ प्रतिशत महिला कम्तीमा ७५ वर्ष उमेरसम्म बाँच्ने अनुमान गरिएको छ । त्यस्तै ९० वर्ष उमेर पुग्ने सम्भावना पुरुषमा २६.७ प्रतिशत र महिलामा ५०.८ प्रतिशत रहेको छ ।

सन् २०२५ मा जन्मिएका जापानी पुरुषमध्ये २५.४१ प्रतिशत क्यान्सर र १३.६० प्रतिशत मुटुरोगका कारण मृत्यु हुने अनुमान गरिएको छ । महिलामा भने बुढ्यौली (२१.७४ प्रतिशत) मृत्युको प्रमुख कारण रहने अनुमान गरिएको छ भने त्यसपछि क्यान्सर (१८.९५ प्रतिशत) दोस्रो प्रमुख कारण रहने उल्लेख गरिएको छ ।

मन्त्रालयका अनुसार यदि क्यान्सरका कारण हुने मृत्यु पूर्ण रूपमा हटाउन सकिने हो भने जापानी पुरुषको औसत आयु ३.०७ वर्ष र महिलाको २.६६ वर्ष थप बढ्न सक्ने अनुमान गरिएको छ।