टोकियो, जापान ।

जापानमा बिहानको नास्ता त्यो पनि १०० रुपैयाँमा । झट्ट सुन्दा यो कुरा धेरैलाई पत्यार नलाग्न सक्छ । तर अझैपनि जापानको एक विश्वविद्यालयले बिहानको नास्ता मात्र १०० येनमा उपलब्ध गराउँदै आएको छ ।

जापानमा खाद्यान्नको मूल्य निरन्तर बढिरहेका बेला यामानाशी प्रान्तको त्सुरु शहरस्थित त्सुरु विश्वविद्यालयले उपलब्ध गराउँदै आएको १०० येनको सन्तुलित नास्ता विद्यार्थीमाझ अत्यन्त लोकप्रिय बनेको छ । हरेक बिहान विद्यार्थी भोजनालय खुल्नुअघि नै १५० भन्दा बढी विद्यार्थी लामबद्ध हुने गरेका छन् ।

विश्वविद्यालयले सन् २०१५ देखि सञ्चालन गर्दै आएको यो कार्यक्रमको उद्देश्य विद्यार्थीहरूले कम खर्चमा पौष्टिक भोजन प्राप्त गरून् भन्ने हो । सुरुमा दैनिक करिब ५० सेट नास्ता तयार गरिने गरिएकोमा अहिले दैनिक औसत १५० देखि १६० सेट नास्ता तयार गरिने गरिएको विश्वविद्यालयले जनाएको छ ।

जुलाई ३ को बिहान हल्का वर्षाका बीच बिहान ८ बज्नुअघि नै करिब ५० मिटर लामो लाइन लागेको थियो । त्यस दिनको नास्तामा ह्याम्बर्ग स्टेक, सलाद, मिसो सूप र भात समावेश थियो । विद्यार्थीहरूले भोजन लिएपछि तोकिएको ट्रेमा १०० येन राखेर भुक्तानी गरेका थिए ।

अप्रिलदेखि विश्वविद्यालयमा अध्ययन सुरु गरेकी आओई इचिकावाले आफू एक्लै बस्ने भएकाले सामान्यतया बिहान अघिल्लो दिनको बाँकी खाना खाने गरेको बताइन् । उनले भनिन्, “यहाँ आएपछि विभिन्न परिकार खान पाइन्छ, साथीहरूसँग बसेर खान पाउँदा झन् रमाइलो हुन्छ ।”

त्यस्तै ओकिनावा प्रान्तबाट आएकी पहिलो वर्षकी विद्यार्थी रियोन किन्जोले पनि खाद्यान्नको मूल्य बढेपछि जीवनयापन कठिन बन्दै गएको बताइन् । उनले भनिन्, “एक्लै बस्दा फ्राइड फुड वा ह्याम्बर्ग स्टेक आफैं बनाउने सम्भावना कम हुन्छ । १०० येनमै यस्तो खाना खान पाउँदा निकै खुसी लाग्छ।”

त्यस दिन तयार गरिएका १६० सेट नास्ता करिब ३० मिनेटमै सकिएका थिए । त्यसपछि थप २० जनाका लागि करी तयार गरिएको थियो ।

भोजन तयार गर्ने ४५ वर्षीया मिहारु फुजिवाराले आफ्ना पनि विश्वविद्यालयमा पढ्ने उमेरका सन्तान रहेको उल्लेख गर्दै भनिन्, “विद्यार्थीका अभिभावकले ढुक्क हुने गरी पौष्टिक नास्ता तयार गर्ने प्रयास गर्छौं ।” विश्वविद्यालयमा सोमबार, बुधबार र शुक्रबार सेट नास्ता तथा मंगलबार र बिहीबार भातका परिकार र करी उपलब्ध गराइन्छ ।

त्सुरु विश्वविद्यालय टोकियोबाट करिब डेढ घण्टाको दूरीमा रहेको र आसपासको भाडा तुलनात्मक रूपमा सस्तो भएकाले जापानभरिबाट विद्यार्थी अध्ययनका लागि यहाँ आउने गर्छन् । करिब ३,५०० विद्यार्थीमध्ये ८० देखि ९० प्रतिशत विद्यार्थी एक्लै बस्ने र अधिकांशले आफैं खाना पकाउने गरेका छन् ।

विश्वविद्यालयको विद्यार्थी सहायता विभागका प्रमुख त्सुयोशी उएनोका अनुसार केही विद्यार्थीले बिहानको खाना नै नखाने भएकाले यो कार्यक्रमले उनीहरूको स्वास्थ्य र अध्ययनमा सकारात्मक प्रभाव पारेको छ । साथै, एक्लै बस्दा एक्लोपन महसुस गर्ने विद्यार्थीले भोजनालयमा भेटघाट गर्दै नयाँ साथी बनाउने अवसर समेत पाएका छन् ।

खाद्यान्नको मूल्य र सञ्चालन खर्च बढ्दै गए पनि विश्वविद्यालयले विद्यार्थीलाई राहत दिने उद्देश्यले १०० येनकै मूल्यमा नास्ता उपलब्ध गराउने योजना निरन्तर जारी राख्ने जनाएको छ ।