ओकिनावा, जापान ।

जापानकी प्रधानमन्त्री सानाए ताकाइचीलाई दोस्रो विश्वयुद्धको ओकिनावा युद्धका मृतकहरूको सम्झनामा आयोजित राष्ट्रिय स्मृति समारोहमा युद्धविरोधी प्रदर्शनकारीहरूले नाराबाजी गर्दै अवरोध गरेका छन् ।

ओकिनावामा आयोजित समारोहमा प्रधानमन्त्री ताकाइचीले भाषण सुरु गरेलगत्तै दर्शकदीर्घाबाट “युद्ध चाहिँदैन”, “संविधानको धारा ९ जोगाऊ” तथा “शान्तिवादको रक्षा गर” जस्ता नाराहरू गुञ्जिएका थिए । केही प्रदर्शनकारीहरूलाई सुरक्षाकर्मीहरूले कार्यक्रमस्थलबाट बाहिर निकालेका थिए ।

यो समारोह ओकिनावा युद्ध समाप्त भएको ८१औँ वर्षको स्मृतिमा आयोजना गरिएको थियो । सन् १९४५ मा भएको उक्त युद्ध जापानी भूमिमा लडिएको दोस्रो विश्वयुद्धकै सबैभन्दा रक्तपातपूर्ण युद्धमध्ये एक मानिन्छ, जसमा दुई लाखभन्दा बढी सैनिक तथा सर्वसाधारण नागरिकको ज्यान गएको थियो ।

प्रधानमन्त्री ताकाइचीले आफ्नो सम्बोधनमा युद्धका पीडितप्रति श्रद्धाञ्जली अर्पण गर्दै जापानले “फेरि कहिल्यै युद्धको विनाश दोहोरिन नदिने” प्रतिबद्धता कायम राख्ने बताइन् । साथै उनले ओकिनावामा केन्द्रित अमेरिकी सैन्य अड्डाहरूको भार कम गर्न सरकार प्रयत्नरत रहेको पनि दाबि गरिन् ।

तर ओकिनावावासीहरू भने ताकाइची सरकारको पछिल्लो सुरक्षा नीतिप्रति असन्तुष्ट देखिएका छन् । चीन र उत्तर कोरियाबाट बढ्दो सुरक्षा चुनौतीको हवाला दिँदै जापानले रक्षा बजेट विस्तार, सैन्य क्षमता सुदृढीकरण तथा युद्ध त्याग्ने संविधानको धारा ९ संशोधनबारे छलफल अघि बढाइरहेको छ । यही कारण शान्तिवादी समूहहरूले सरकारमाथि जापानलाई क्रमशः सैन्यीकरणतर्फ धकेलिरहेको आरोप लगाउँदै आएका छन् ।

हालैका महिनाहरूमा जापानभर धारा ९ को संरक्षणको माग गर्दै हजारौँ मानिसहरू सडकमा उत्रिएका छन् । युद्धपछिको जापानको शान्तिवादी पहिचान कमजोर बनाउने कुनै पनि प्रयास स्वीकार्य नहुने भन्दै नागरिक समूहहरूले विरोध प्रदर्शन तीव्र बनाएका छन् ।

ओकिनावाको स्मृति समारोहमा भएको यो घटना जापानमा राष्ट्रिय सुरक्षा सुदृढीकरण र परम्परागत शान्तिवादी नीतिबीच बढ्दो वैचारिक टकरावको पछिल्लो उदाहरणका रूपमा हेरिएको छ ।