टोकियो, जापान ।

जापानमा विदेशमा अवैध रूपमा रकम पठाउने 'भूमिगत बैंक' चलाएको आरोपमा क्योटो प्रिफेक्चरल प्रहरीले एक चिनियाँ महिलालाई पक्राउ गरेको छ। सन् २०२४ को डिसेम्बरदेखि २०२५ को नोभेम्बरसम्ममा ती महिलाले जापानमा बस्ने ३ जना चिनियाँ नागरिकको अनुरोधमा ८ पटक गरी करिब १ करोड २२ लाख ८० हजार येन बुझेकी थिइन्।

सो रकम उनले चीनमा रहेका सम्बन्धित व्यक्तिहरूलाई त्यहाँकै स्थानीय मुद्रामा भुक्तानी गरिन्। अनुमतिबिना बैंकिङ व्यवसाय चलाएको आरोपमा उनलाई बैंकिङ ऐन उल्लंघनको शंका लागेको छ।क्योटो प्रहरीले यस कार्यलाई अपराधबाट आर्जित रकम (क्राइम प्रोसिड्स) ओसारपसार गर्न प्रयोग गरिएको आशंकामा अनुसन्धान गरिरहेको छ। संदिग्ध महिलाले "मलाई जापानको कानुन थाहा थिएन, यो अवैध काम हो भन्ने सोचेकी थिइनँ" भन्दै आरोपलाई आंशिक रूपमा अस्वीकार गरेकी छिन्।

समाचार अनुसार अवैध रूपमा पठाइएको रकमको केही हिस्सा चोरीका घटनाहरूबाट आर्जित भएको देखिन्छ। जापानमा अनुमतिबिना वित्तीय कारोबार गर्नु र बैंकिङ ऐन उल्लंघन गर्नु गम्भीर अपराध हो। जापानमा रहेका विदेशी नागरिकहरूले रकम पठाउँदा सधैं आधिकारिक र अनुमति प्राप्त बैंक वा रेमिट्यान्स सेवाहरू मात्र प्रयोग गर्नु अनिवार्य छ।

कानुनी माध्यमबाट बाहेक अन्य तरिकाले रकम पठाउनु वा त्यस्ता कार्यमा सहयोग गर्नुले कडा कानुनी कारबाही, जरिवाना र भिसा सम्बन्धी समस्याहरू निम्त्याउन सक्छ। जापानमा सुरक्षित रहन यहाँका वित्तीय कानुनहरूको पालना गर्नु अत्यन्त महत्त्वपूर्ण छ।
-YAHOO NEWS