टोकियो, जापान ।

जापानको इबाराकी प्रान्तस्थित युनिभर्सिटि अफ चुकुबाले आफ्ना दुई सहप्राध्यापकले सामाजिक सञ्जालमा विदेशी विद्यार्थी र विदेशी नागरिकबारे आपत्तिजनक तथा भेदभावपूर्ण टिप्पणी गरेपछि औपचारिक रूपमा माफी मागेको छ ।

दि जापान टाईम्समा प्रकाशित समाचार अनुसार विश्वविद्यालयले उक्त घटनाबारे आन्तरिक छानबिन सुरु गरेको जनाएको छ।

के भएको थियो ?

समाचार अनुसार एक सहप्राध्यापकले सामाजिक सञ्जाल प्लेटफर्म एक्स मा विदेशी विद्यार्थीहरूलाई “अयोग्य” र “समस्या निम्त्याउने” भन्दै टिप्पणी गरेका थिए । उनले अज्ञात पृष्ठभूमिका विदेशी आवेदकका इमेललाई बेवास्ता गर्ने समेत बताएका थिए ।

उक्त पोस्ट अर्को प्रयोगकर्ताको टिप्पणीको जवाफमा गरिएको थियो, जसमा उत्कृष्ट अन्तर्राष्ट्रिय विद्यार्थीहरू जापानभन्दा अमेरिका जाने र जापानमा अध्ययन गर्न आउने केही विदेशी विद्यार्थीहरू अनुसन्धान योग्य नभएको टिप्पणी गरिएको थियो।

यसैबीच अर्का सहप्राध्यापकले थाइल्याण्डको राजनीतिक प्रणालीबारे अपमानजनक टिप्पणी गरेका थिए, जसले थप विवाद निम्त्याएको बताइएको छ।

विश्वविद्यालयले जारी गरेको वक्तव्यमा ती पोस्टहरूमा “विदेशी विद्यार्थीप्रति भेदभावपूर्ण भाषा प्रयोग गरिएको” र “अन्य देशप्रति सम्मानको अभाव देखिएको” स्वीकार गर्दै प्रभावित सबैसँग माफी मागेको छ । साथै, उक्त अभिव्यक्तिहरूले विश्वविद्यालयको नियम वा सामाजिक सञ्जाल मार्गदर्शन उल्लंघन गरेको हो कि होइन भन्ने विषयमा अनुसन्धान भइरहेको जनाएको छ।

विश्वविद्यालयले भविष्यमा यस्ता घटना नदोहोरियोस् भनेर संकाय सदस्यहरूलाई आफ्नो जिम्मेवारीप्रति सचेत रहन आग्रह गर्ने र आवश्यक चेतावनी दिने जनाएको छ।

विश्वविद्यालयका अनुसार सन् २०२५ अक्टोबरसम्म यहाँ ११५ देशबाट करिब २,४६६ विदेशी विद्यार्थी अध्ययनरत छन्, जसले यस विषयलाई अझ संवेदनशील बनाएको छ।

विश्लेषकहरूका अनुसार यो घटना जापानका विश्वविद्यालयहरूमा अन्तर्राष्ट्रियकरण र विदेशी विद्यार्थीप्रतिको दृष्टिकोणबारे पुनः बहस सुरु गराउने खालको हुन सक्छ, विशेष गरी विदेशी विद्यार्थीको संख्या बढ्दै गएको सन्दर्भमा यसलाई नयाँ अध्यागमन नियमहरुसँग समेत जोडेर हेर्न थालिएको छ । जहाँ जापानले सानाए ताकइची प्रधानमन्त्री भएपछि बिदेशीहरुप्रति कडा अध्यागमन नीति अपनाउन थालेको छ ।