टोकियो, जापान ।

जापानलाई नेपाली विद्यार्थीहरुले गन्तव्य बनाउने क्रम यसरी बढेको छ कि पछिल्लो ताजा तथ्यांक अनुसार डेढ अर्ब जनसंख्या भएको चीनका १ लाख २३ हजार विद्यार्थी पाईंदा ३ करोड भन्दा कम जनसंख्या भएको नेपालबाट ६४ हजार विद्यार्थी जापान अध्ययनरत छन् ।

तथ्यांक अनुसार २०२४ मा जापानमा विदेशी विद्यार्थी आगमन बृद्धिसँगै नयाँ किर्तिमानी संख्या दर्ता भएको छ ।

स्वतन्त्र प्रशासनिक निकाय, जापान विद्यार्थी सेवा संगठनले गरेको एक अध्ययनले मे १, २०२४ सम्म जापानमा ३३६,७०८ विदेशी विद्यार्थीहरू रहेको पत्ता लगाएको छ । यो संख्या अघिल्लो वर्षको तुलनामा २१ प्रतिशतले बढी हो ।

यो कोभिड महामारी अघि २०१९ को तुलनामा बढी हो र नयाँ रेकर्ड कायम गरेको छ। कमजोर येनले धेरै युवाहरूलाई जापानमा अध्ययन गर्न रोज्न प्रोत्साहित गरेको मानिन्छ।

जापानमा विदेशी विद्यार्थीहरूको संख्या २०१३ बाट निरन्तर बढ्दै आएको छ । यसअघि यो संख्या २०१९ मा ३१२,००० पुगेको थियो ।

महामारीको समयमा घटेपछि, २०२३ बाट यो फेरि बढ्न थालेको छ । २०२४ को तथ्याङ्कमा जापानी भाषा विद्यालयहरूमा भर्ना भएका १०७,२४१ विद्यार्थीहरूको रेकर्ड समावेश छ । उच्च शिक्षा संस्थाहरूमा २२९,४६७ जना थिए, जसमध्ये ९१,१९२ जना विश्वविद्यालयहरूमा स्नातक वा जुनियर कलेज वा प्रविधि कलेजहरूमा अध्ययन गरिरहेका छन् ।

क्षेत्रको आधारमा कुल विद्यार्थी मध्ये ९२.५ प्रतिशत विद्यार्थीहरू अर्थात् ३११,५६६ जना एसियाबा छन् । युरोपबाट ४ प्रतिशत अर्थात् १३,३१२ जना पाईंदा उत्तर अमेरिकाबाट १.३ प्रतिशत ४,५१६ जना जापानमा अध्ययनरत छन् ।

सबैभन्दा धेरै चिनियाँ विद्यार्थी, दोस्रोमा नेपाल

देशको आधारमा १२३,४८५ विद्यार्थीहरूको साथ कुल विदेशी वद्यार्थीको ३६.७ प्रतिशत चिनियाँ विद्यार्थी जापानमा अध्ययनरत छन् ।

यसपछि नेपाली विद्यार्थीहरुको संख्या दोस्रो उच्च पाइएको छ । कुल बिदेशी विद्यार्थी मध्ये १९.२ प्रतिशत अर्थात् ६४,८१६ जना नेपाली विद्यार्थीहरु जापानमा अध्ययनरत छन् ।

यस्तै भियतनामी विद्यार्थीहरु १२ प्रतिशतको साथ ४०,३२३ जना, म्यानमारबाट ४.९ अर्थात् १६,५९६, दक्षिण कोरियाबाट केवल ४.३ प्रतिशत १४,५७९ जना रहेका छन् ।

यसैगरि श्रीलंकाली विद्यार्थी ३.६ प्रतिशत १२,२६९ र ताइवानका २.३ प्रतिशत ७,६५५ जना रहेका छन् ।

नेपालबाट आउने विद्यार्थीहरूको संख्या वर्षैपिच्छे २६,००० भन्दा बढीले बढेको छ । समग्रमा, ५५.३ प्रतिशत विद्यार्थीहरू पुरुष र ४४.६ प्रतिशत महिला रहेका छन् ।

वासेदा विश्वविद्यालयमा सबैभन्दा बढी ५,५६२ विदेशी विद्यार्थीहरू रहेका छन् । त्यसपछि टोकियो विश्वविद्यालयमा ४,७९३, रित्सुमेइकन विश्वविद्यालयमा ३,२५८, क्योतो विश्वविद्यालयमा २,७९१ र रित्सुमेइकन एसिया प्यासिफिक विश्वविद्यालयमा २,७७६ विदेशी विद्यार्थीहरू अध्ययनरत छन् ।