टोकियो, जापान ।

जापानमा विदेशी नागरिकबाट जन्मिएका शिशुको संख्या सन् २०२५ मा अहिलेसम्मकै उच्च बिन्दुमा पुगेको छ । लगातार तेस्रो वर्ष विदेशी नागरिकका नवजात शिशुको संख्या बढ्दै गएको जापानको सार्वजनिक प्रसारण संस्था एनएचकेले जनाएको छ ।

जापानको स्वास्थ्य मन्त्रालयले गत महिना सार्वजनिक गरेको जनसांख्यिक तथ्यांक अनुसार सन् २०२५ मा जापानी नागरिकबाट जन्मिएका शिशुको संख्या ६ लाख ७१ हजार २७० रहेको छ । यो अहिलेसम्मकै न्यून संख्या हो । यसको विपरीत, जापानमा बसोबास गर्ने विदेशी नागरिकबाट जन्मिएका शिशुको संख्या २३ हजार १५ पुगेको छ, जुन अहिलेसम्मकै उच्च हो ।

टोकियोमा सबैभन्दा धेरै विदेशी शिशुको जन्म

विदेशी नागरिकबाट जन्मिएका शिशुको संख्याका आधारमा टोकियो पहिलो स्थानमा रहेको छ । टोकियोमा सन् २०२५ मा ४ हजार १२४ शिशुको जन्म भएको थियो ।

त्यसैगरी, आइची प्रिफेक्चरमा २ हजार ४७१ र साइतामा प्रिफेक्चरमा २ हजार १५३ शिशुको जन्म भएको तथ्यांकले देखाएको छ ।

एनएचकेले सरकारबाट प्रकाशित ८१५ वटा सहर तथा वार्डका नवजात शिशुसम्बन्धी तथ्यांकसमेत विश्लेषण गरेको थियो । सन् २०१९ मा विदेशी नागरिकका शिशुको हिस्सा कुल जन्मको १० प्रतिशतभन्दा बढी भएका स्थानीय तहको संख्या १० मात्र थियो । तर सन् २०२५ मा यस्तो संख्या बढेर ३१ पुगेको छ। यो सन् २०१९ को तुलनामा तीन गुणाभन्दा बढी हो ।

केही क्षेत्रमा २० प्रतिशतभन्दा बढी विदेशी शिशुको जन्म

राष्ट्रिय स्तरमा जापानमा जन्मिएका कुल शिशुमध्ये विदेशी नागरिकका शिशुको हिस्सा ३ प्रतिशतभन्दा केही बढी छ । तर जन्मदर घटिरहेको र श्रमिक अभाव गम्भीर बन्दै गएका केही क्षेत्रमा विदेशी शिशुको अनुपात २० प्रतिशतभन्दा माथि पुगेको छ ।

शिजुओका प्रिफेक्चरको आतामी सहरमा कुल जन्ममध्ये विदेशी शिशुको हिस्सा २४.६ प्रतिशत रहेको छ । इबाराकी प्रिफेक्चरको जोसो सहरमा २२.५ प्रतिशत र साइतामा प्रिफेक्चरको वाराबी सहरमा २१.२ प्रतिशत रहेको एनएचकेको रिपोर्टमा उल्लेख छ ।

विदेशी श्रमिकसँगै परिवार ल्याउने क्रम बढ्दो

विशेषज्ञहरूका अनुसार जापानमा विदेशी नागरिकबाट जन्मिने शिशुको संख्या बढ्नुको एउटा प्रमुख कारण परिवार सहित जापानमा बसोबास गर्न पाउने आवासीय हैसियत अन्तर्गत काम गर्ने विदेशी नागरिकको संख्या बढ्नु हो ।

मेइजो विश्वविद्यालयका प्राध्यापक कोन्दो अत्सुसीका अनुसार जापानमा जनसंख्या निरन्तर घट्दै जाँदा यहाँ हुर्किरहेका विदेशी बालबालिका भविष्यमा स्थानीय समुदायका महत्त्वपूर्ण आधार बन्न सक्ने देखिन्छ ।

उनले जापानी तथा विदेशी दुवै समुदायका बालबालिकाले समान रूपमा हुर्कने, शिक्षा प्राप्त गर्ने र आफ्नो क्षमता विकास गर्ने वातावरण निर्माण गर्न आवश्यक रहेकोमा जोड दिए ।

जापानले घट्दो जन्मदर, वृद्ध जनसंख्या र श्रमिक अभावजस्ता चुनौती सामना गरिरहेका बेला विदेशी नागरिकका परिवार तथा उनीहरूका सन्तानको बढ्दो उपस्थितिले स्थानीय समुदायको भविष्यमा महत्त्वपूर्ण भूमिका खेल्न सक्ने देखिएको छ ।