टोकियो, जापान ।

नेपाल–चीन सीमा क्षेत्रमा यसै साता आएको विनाशकारी बाढी तथा पहिरोमा एकै परिवारका पाँच जापानी नागरिक अझै बेपत्ता रहेको जापानी संचार माध्यमहरुले उल्लेख गरेका छन् ।

जापानी सञ्चारमाध्यमका अनुसार नेपाल पर्यटनसम्बन्धी अधिकारीहरूले सार्वजनिक गरेको विदेशी पर्यटकको सूचीमा यामामोतो थर भएका पाँच जनाको नाम रहेको छ । उनीहरू बेपत्ता रहेका पाँच जापानी नागरिकसँग मिल्दोजुल्दो देखिए पनि यी नै व्यक्ति हुन् भन्ने आधिकारिक पुष्टि भने भइसकेको छैन ।

बेपत्ता परिवारमा ४० वर्ष आसपासका एक दम्पती, १० वर्षीया छोरी तथा ६ र ३ वर्षका दुई छोरा रहेको बताइएको छ ।

नेपालका अधिकारीहरूका अनुसार उक्त परिवार चीनतर्फबाट सीमा पार गरी काठमाडौं आउने योजनामा थियो । उनीहरूले बुधबार बिहान करिब ९ बजे सीमावर्ती क्षेत्रमा रहेका आफ्ना चालकसँग अन्तिम पटक सम्पर्क गरेका थिए । त्यसै आसपासको समयमा चालकसँग पनि सम्पर्क विच्छेद भएको बताइएको छ ।

काठमाडौंमा बुधबारदेखि दुई रातका लागि दुई वयस्कका नाममा होटल बुकिङ गरिएको भए पनि परिवार होटलमा नपुगेको जापानी सञ्चारमाध्यमले जनाएका छन् ।

यसैबीच, नेपाल–चीन सीमा क्षेत्रमा आएको बाढीबाट कम्तीमा ५८६ जनाको मृत्यु भएको र २,४०० भन्दा बढी मानिस अझै बेपत्ता रहेको बताइएको छ । वैज्ञानिकहरूले हिमताल वा हिमनदी भत्किनु तथा ठूलो पहिरो जानुलाई विनाशकारी बाढीको सम्भावित कारणका रूपमा औंल्याएका छन् ।

जापान सरकारले पनि पाँच जना जापानी नागरिक अझै सम्पर्कविहीन रहेको जनाएको छ । तर उनीहरू नै यामामोतो परिवारका पाँच सदस्य हुन् वा होइनन् भन्ने विषयमा अहिलेसम्म आधिकारिक पुष्टि भएको छैन ।