टोकियो, जापान । 

टोकियोको फुस्सा सहरमा एक १७ वर्षीय किशोरमाथि ह्याम्मर प्रहार गरी फरार भएका ४४ वर्षीय ताकाबायाशी तेरुयुकीलाई प्रहरीले चिबा प्रान्तबाट पक्राउ गरेको छ। 

अप्रिल २९ देखि फरार रहेका उनलाई 'हत्या प्रयास' को अभियोगमा मे १ तारिख दिउँसो नाराशिनो सहरको एक अपार्टमेन्टबाट नियन्त्रणमा लिइएको हो । 

मे १ को दिउँसो करिब ४ बजेतिर चिबा प्रान्तको एक कोठाबाट उनलाई रंगेहात पक्राउ गरिएको थियो। पक्राउका क्रममा उनले कुनै प्रतिरोध नगरेको र शान्त रहेको प्रहरीले जनाएको छ।

प्रहरीको प्रारम्भिक सोधपुछमा ताकाबायाशीले किशोरमाथि प्रहार गरेको स्वीकार गरे पनि "मार्ने उद्देश्य नरहेको" दाबी गरेका छन्।

छोरा पक्राउ परेपछि उनकी आमाले सञ्चारकर्मीसँग कुरा गर्दै राहत महसुस भएको बताएकी छन्। उनले भनिन्, "छोरा पक्राउ परेको खबरले मलाई ढुक्क बनायो। अरू कसैलाई थप क्षति नपुर्‍याउँदै उनी समातिएकोमा म कृतज्ञ छु।"फुस्सा प्रहरी स्टेशनमा ल्याइयो:पक्राउ लगत्तै उनलाई टोकियोको फुस्सा प्रहरी स्टेशनमा ल्याइएको थियो । 

हुड लगाएका ताकाबायाशीले त्यहाँ उपस्थित सञ्चारकर्मीहरूको भीडलाई शान्त भएर हेरिरहेका थिए।प्रहरीले अहिले यस घटनाको पछाडि रहेको वास्तविक कारण र ताकाबायाशी फरार भएको समयमा कहाँ-कहाँ बसेका थिए भन्नेबारे विस्तृत अनुसन्धान गरिरहेको छ।