टोकियो, जापान ।

फिफा विश्वकप २०२६ को राउन्ड अफ ३२ मा आज एसियाली पावरहाउस जापान र पाँच पटकको विश्व च्याम्पियन ब्राजिल आमनेसामने हुँदैछन् । दुवै टोली अन्तिम १६ मा स्थान बनाउन मैदान उत्रने भएकाले खेल निकै रोमाञ्चक हुने अपेक्षा गरिएको छ ।

जापानले समूह चरणमा उत्कृष्ट प्रदर्शन गर्दै नकआउट चरणमा स्थान बनाएको थियो । अनुशासित रक्षा पंक्ति, तीव्र काउन्टर अट्याक र सामूहिक खेल जापानको मुख्य बल मानिएको छ । ब्राजिलविरुद्ध पनि जापानले यिनै पक्षमा भर पर्ने अपेक्षा गरिएको छ ।

यता प्रशिक्षक कार्लो एन्सेलोटी को नेतृत्वमा रहेको ब्राजिल आक्रामक लयमा देखिएको छ । बलियो आक्रमण र व्यक्तिगत प्रतिभाले भरिएको टोलीलाई उपाधिको प्रमुख दाबेदारका रूपमा हेरिएको छ ।

दुवै टोली यसअघि पनि विश्वकपमा भिडिसकेका छन् । सन् २००६ को समूह चरणमा ब्राजिलले जापानलाई ४–१ ले पराजित गरेको थियो । त्यसको करिब दुई दशकपछि जापानसँग बदला लिने अवसर र ब्राजिलसँग आफ्नो इतिहास कायम राख्ने चुनौती रहेको छ ।

यस खेलको विजेताले विश्वकपको अन्तिम १६ मा स्थान बनाउनेछ भने पराजित टोलीको उपाधि यात्रा समाप्त हुनेछ । त्यसैले यो खेललाई आजको नकआउट चरणकै सबैभन्दा आकर्षक प्रतिस्पर्धामध्ये एक मानिएको छ ।

जापान र ब्राजिल विश्वकपमा अहिलेसम्म एकपटक मात्र भिडेका छन्। सन् २००६ विश्वकप को समूह चरणमा भएको खेलमा ब्राजिलले जापानलाई ४–१ ले पराजित गरेको थियो। त्यस खेलमा ब्राजिलका स्टार रोनाल्डो ले दुई गोल गरेका थिए भने जुनिन्हो र गिल्बर्टो ले एक–एक गोल थपेका थिए। जापानका लागि केइजी तामाडा ले सुरुआती गोल गरेका थिए।

२० वर्षपछि फेरि विश्वकपमा यी दुई राष्ट्र आमनेसामने हुन लागेका छन्। जापानसँग इतिहास बदल्ने अवसर छ भने ब्राजिल आफ्नो प्रभुत्व कायम राख्न चाहन्छ।

जापानका लागि किन विशेष छ यो खेल ?

जापान पछिल्ला केही वर्षमा विश्व फुटबलकै सबैभन्दा धेरै सुधार गरेको टोलीमध्ये एक मानिन्छ । सन् २०२२ को विश्वकपमा जर्मनी र स्पेनजस्ता बलिया टोलीलाई हराएर जापानले विश्वलाई चकित पारेको थियो । अहिलेको टोली अझ परिपक्व, व्यवस्थित र आत्मविश्वासी देखिन्छ ।

ब्राजिलको विश्वकप इतिहास

ब्राजिल विश्वकप इतिहासकै सबैभन्दा सफल राष्ट्र हो । ब्राजिलले १९५८, १९६२, १९७०, १९९४ र २००२ मा गरेर ५ पटक विश्वकप उपाधि उचालिसकेको छ ।

हरेक विश्वकपमा छनोट हुने एकमात्र देशको रुपमा हालसम्म ब्राजिल मात्र रहेको छ ।

पेले, रोनाल्डो, रोनाल्डिन्हो, काका, नेयमारजस्ता विश्वप्रसिद्ध खेलाडी जन्माएको राष्ट्रको रुपमा ब्राजिललाई चिनिन्छ । अझ भनौं यो देशको पहिचान नै अर्को फुटबल हो ।

जापानको विश्वकप यात्रा

पहिलो पटक जापानले १९९८ मा विश्वकप खेलेको थियो । हालसम्म चार पटक नकआउट चरण पुगेको जापानले यसपटक विश्वकपको क्वार्टरफाइनल पुग्ने लक्ष्य राखेको छ ।

ब्राजिलको जापानमा निकै ठूलो आप्रवासी समुदाय छ । जापानमा बस्ने ब्राजिलियनहरूको संख्या विश्वकै सबैभन्दा ठूलो जापानबाहिरको ब्राजिलियन समुदायमध्ये एक हो ।

जापानी फुटबलका धेरै खेलाडीले ब्राजिलियन शैलीबाट प्रेरणा लिएका छन् । दुई देशबीच फुटबल सम्बन्ध दशकौँदेखि बलियो रहँदै आएको छ, र धेरै ब्राजिलियन खेलाडी तथा प्रशिक्षकले जापानको लिगमा योगदान दिएका छन् ।

ब्राजिल व्यक्तिगत प्रतिभा, आक्रमण र अनुभवका कारण बलियो देखिए पनि जापानको अनुशासित रक्षा, तीव्र काउन्टर अट्याक र सामूहिक खेलले कुनै पनि टोलीलाई चुनौती दिन सक्छ । त्यसैले यो खेल अनुभव र अनुशासनबीचको रोमाञ्चक प्रतिस्पर्धाका रूपमा हेरिएको छ।

विश्वभरका फुटबल समर्थकको नजर आज यही खेलमा रहनेछ । जापानले इतिहास रच्नेछ कि ब्राजिलले आफ्नो गौरवपूर्ण विरासतलाई निरन्तरता दिनेछ भन्ने जवाफ मैदानबाटै फैसला हुनेछ । मात्र यत्ति हो कि यो फैसला ९० मिनेट मित्रै अनुमान गर्न सकिने अवस्था बन्ने छ कि अतिरिक्त समय खर्चनुपर्ने हो त्यो यसै भन्न सकिने अवस्था छैन ।