टोकियो, जापान ।

जापानकी प्रधानमन्त्री सानाए ताकाइची आगामी जुलाई महिनामा भारत भ्रमणमा जान सक्ने तयारी भइरहेको जनाइएको छ । जापानी सरकारी स्रोतलाई उद्धृत गर्दै सार्वजनिक भएको जानकारी अनुसार ताकाइचीले भारतीय प्रधानमन्त्री नरेन्द्र मोदीसँग भेटवार्ता गर्ने सम्भावना रहेको छ।

भेटवार्ता भारतको उत्तरपूर्वी राज्य आसाममा हुन सक्ने बताइएको छ। यो दुवै नेताबीच दोस्रो प्रत्यक्ष भेट हुनेछ।

जापान र भारतबीच सुरक्षा, अर्थतन्त्र, ऊर्जा आपूर्ति तथा महत्वपूर्ण खनिज स्रोतको आपूर्ति श्रृंखला सुदृढ बनाउने विषयमा विशेष छलफल हुने अपेक्षा गरिएको छ । मध्यपूर्व क्षेत्रमा जारी तनावका कारण ऊर्जा सुरक्षाको विषय पनि मुख्य एजेन्डा बन्न सक्ने छ ।

विश्लेषकहरूका अनुसार जापान–भारत सम्बन्ध अझ सुदृढ हुँदै जाँदा दक्षिण एसियाली क्षेत्रमा आर्थिक तथा रणनीतिक सहकार्य विस्तार हुन सक्छ, जसको प्रभाव नेपालजस्ता छिमेकी मुलुकहरूमा समेत पर्न सक्ने देखिएको छ।

जापानले पछिल्ला वर्षहरूमा नेपालमा पूर्वाधार, शिक्षा तथा विकास परियोजनामा लगानी र सहयोग बढाइरहेको अवस्थामा भारतसँगको घनिष्ठ सहकार्यले क्षेत्रीय विकासमा समेत नयाँ सम्भावना सिर्जना गर्न सक्ने अनुमान गरिएको छ।