एजेन्सी ।

शुक्रबार म्यानमारमा गएको ७.७ म्याग्निच्युडको विनाशकारी भूकम्पमा परी मृत्यु हुनेको संख्या बढ्दै गएको छ । उद्धार कार्य जारी रहँदा मृतकको संख्या १ हजार नाघेको छ ।

शुक्रबार मध्यान्हतिर गएको भूकम्प म्यानमारको दोस्रो ठूलो शहर मन्डलेको पश्चिममा केन्द्रबिन्दु भएर गएको थियो । यसको प्रभाव राजधानी नेपिताव सहित धेरै प्रमुख शहरी केन्द्रहरूमा महसुस गरिएको छ ।

प्रारम्भिक रिपोर्टहरूले मृतकको संख्या १४४ रहेको बताएका छन्, तर म्यानमारको सैन्य जुन्टाका नेता, वरिष्ठ-जनरल मिन आङ ह्लाइङ शनिबार बिहान मन्डले आइपुगेपछि, संशोधित तथ्याङ्कहरू जारी गरिएको छ जसमा मृत्यु हुनेको संख्या १,००२ रहेको छ भने अन्य २,४०० जना भन्दा धेरै घाइते भएका छन् ।

जारी खोज र उद्धार कार्यको बीचमा यी संख्याहरू बढ्ने अपेक्षा गरिएको छ, धेरै अझै पनि भग्नावशेषमुनि फसेको आशंका गरिएको छ।

भूकम्पले म्यानमारमा भवन, पुल, सडक भत्किएका छन् । म्यानमारको सैन्य सरकारले अन्तर्राष्ट्रिय सहयोगका लागि अपिल गरेको छ ।

चिनियाँ विपद् प्रतिकार्य ३७ जनाको टोली पुगेको छ । टोली एक सय १२ सेट आपतकालीन उद्धार सामग्रीसहित पुगेको हो । सैन्य सरकारले देशका ६ ठाउँमा आपत्कालीन अवस्था घोषणा गरेको पनि जानकारी दिएको छ ।

कुनै पनि देश या संस्थालाई सहयोग खुला गरिएको बीबीसीले जनाएको छ । यस्तै थाई प्रधानमन्त्री पेतोङतार्न सिनावात्राले आपतकालीन अवस्था घोषणा गरिएको बताउनुभएको छ ।

भूकम्पले म्यानमार र सीमावर्ती थाइल्यान्डका बैंककसहित विभिन्न क्षेत्रमा क्षति पुगेको छ । म्यानमारमा पहिलो भूकम्प गएको १२ मिनेटपछि फेरि ६ दशमलव ४ म्याग्निच्युडको अर्को भूकम्प गएको अमेरिकी भूगर्भ सर्वेक्षण ९यूएसजीएस० ले जनाएको छ ।