एजेन्सी ।

बंगलादेशमा भड्किएको आरक्षण विरोधी आन्दोलनका क्रममा ३५ जनाले ज्यान गुमाएका छन । हिंसा देशभर भड्किएपछि नियन्त्रण गर्न सरकारले राष्ट्रव्यापी कर्फ्यू घोषणा गरेको छ।

बंगलादेशमा आरक्षण विरोधी आन्दोलनका क्रममा भएको हिंसामा अहिलेसम्म ३५ जनाको मृत्यु भइसकेको छ। कर्फ्यू घोषणासंगै सेना परिचालन गरिएको छ ।

बंगलादेशमा सन् १९७१ को स्वतन्त्रता संग्राममा भाग लिने स्वतन्त्रता सेनानीका परिवारलाई सरकारी जागिरमा दिएको आरक्षणको विरोधमा विद्यार्थी र युवाहरूको आन्दोलन चलिरहेको छ । तर यो आन्दोलनले अहिले हिंसात्मक रूप लिएको छ।

पछिल्ला केही दिनदेखि राजधानी ढाका लगायत धेरै सहरमा भइरहेको हिंसालाई ध्यानमा राखेर ठूलो मात्रामा सुरक्षाकर्मी परिचालन गरिएको छ।

प्रहरी र आन्दोलनकारीबीच धेरै ठाउँमा झडप भएको छ। शुक्रबार नरसिङदीको कारागारमा आक्रमण गरी सयौं कैदी रिहा भएपछि प्रधानमन्त्री कार्यालयले देशव्यापी कर्फ्यु घोषणा गरेको हो ।