टोकियो, जापान ।
गुण्डा नाइकेको रुपमा कुख्यात बनेर पहिलो पटक नेकपा एमालेको सहयोगमा प्रदेश सांसद बनेर हाल मनाङबाट स्वतन्त्र सांसद रहेका राजीव गुरुङ अर्थात् दीपक मनाङेले गण्डकीमा मन्त्री पद बेच्न राखेको खुलासा गरेका छन् ।
सत्ता खिचातानीको कार्ड बन्दै आएका उनि डेढ वर्षमा तीनपटक सत्ताको कुर्सीमा पुगिसकेका छन् । तर, मनाङेले मन्त्री पदलाई कहिल्यै गम्भीरतापूर्वक लिएका छैनन्, बरु मजाक बनाइरहेका छन् । मुख्यमन्त्री सुरेन्द्रराज पाण्डेले सोमबार मन्त्रालयसँग वरीयता हेरफेर गरिदिएपछि उनले मन्त्री पदबाट राजीनामा दिएका छन् ।
राजीनामापछि नयाँ पत्रिकासँग कुरा गर्दै मनाङेले अधिकार नै नभएको वनमन्त्री बसेर काम नभएकाले राजीनामा दिएको र अब खानै परे मुख्यमन्त्री पाएको खण्डमा विचार गर्ने नत्र अन्य मन्त्रालय नचाहिने प्रतिक्रिया दिएका छन् ।
‘प्रदेशको वनमन्त्रीलाई वन हेर्ने अधिकार नै छैन, अधिकार नभएको मन्त्रालयमा बसेर के गर्ने । जुन दिन वन हेर्ने अधिकार प्रदेशको मन्त्रीलाई हुन्छ, त्यही दिन वनमन्त्री बनुँला,’ पदबाट राजीनामा दिएपछि मनाङेले भने, ‘वनमा रहेका वनमारा र तितेपाती झार हेर्नलाई मात्र मन्त्री किन चाहियो र रु मेरो स्वभाव केही काम गरौँ भन्ने छ, काम नै नहुने मन्त्रालयको मन्त्री बनेर के गर्नु रु’
एमाले चार मन्त्रालय सहित सरकारमा आएपछि मुख्यमन्त्री पाण्डेले मनाङेलाई भौतिक पूर्वाधारबाट वन मन्त्रालयमा सरुवा गरेका थिए । यसअघि पाँच सदस्यीय मन्त्रिपरिषद् रहँदा तेस्रो वरीयतामा रहेका मनाङे हाल नौ सदस्य मन्त्रिपरिषद् बन्दा छैटौँ नम्बरमा पुगेका थिए ।
आफ्नो वरीयतासँगै मन्त्रालय परिवर्तन गरेपछि उनी शपथग्रहण स्थलबाट रिसाउँदै राजीनामा दिने भन्दै बाहिर निस्किएका थिए । त्यसलगत्तै उनले स्वकीय सचिव सन्तोष अधिकारी मार्फत मुख्यमन्त्री कार्यालयमा राजीनामा–पत्र बुझाएका थिए ।
गण्डकीमा दुई मन्त्रालय थप भएपछि एमाले सरकारमा गएको छ । मुख्यमन्त्री सुरेन्द्र पाण्डेले मन्त्रालयको संख्या नौ पुर्याएर एमालेलाई चार मन्त्रालय दिएका हुन् ।
एमालेका जिसी श्रेष्ठले कृषि, भूमि व्यवस्था, कृष्णप्रसाद पाठकले स्वास्थ्य, मित्रलाल बस्यालले उद्योग र प्रकाशबहादुर केसीले भौतिक पूर्वाधारमन्त्रीको शपथ लिए । यसअघि गण्डकीमा मुख्यमन्त्री र चार मन्त्री थिए ।
चार मन्त्रीमध्ये दुई कांग्रेसका, डा. टकराज गुरुङको आर्थिक मामिला र नेपाल समाजवादी पार्टीका फणीन्द्र देवकोटाको ऊर्जा मन्त्रालय यथावत् राखिएको छ । कांग्रेसका विन्दुकुमार थापालाई स्वास्थ्य मन्त्रालयबाट युवा तथा खेलकुदमन्त्री बनाइएको छ ।
