काठमाडौं, नेपाल ।
नेपालमा असोज ११ गतेबाट प्रदर्शनको तयारीमा रहेको चलचित्र ‘सानो संसार’ मा समावेश गीत ‘मग मग फूलबारी’ सार्वजनिक भएको छ ।
संगीतकार राजनराज सिवाकोटीको शब्द तथा संगीत रहेको गीतमा मेलिना राई र संगीतकार सिवाकोटीको स्वर रहेको छ ।
गीतमा फिल्मका अभिनय गर्ने प्राय मुख्य कलाकारहरुलाई देख्न सकिन्छ । शरद महतोले खिचेको सार्वजनिक गीतको भिडियोमा सुजैन खड्का र मनोज खड्काको कोरियोग्राफी रहेको छ ।
पारिवारिक कथावस्तुमा निर्माण भएको फिल्ममा हास्य कलाकार केदार घिमिरे ‘माग्नेबुढा’की श्रीमती सीतादेवी तिमल्सेनाको मुख्य भुमिका रहेको बताइएको छ । फिल्ममा सीताका अलवा राज पंगेनी शर्मा, अनु दाहाल, अन्जसा रिजाल शिशिर शिवाकोटी, सरिता भण्डारी र जीवन गौतमको अभिनय रहेको छ ।
चलचित्रका अधिकांश कलाकारको नेपाली रजतपटमा डेव्यु रहेको भएपनि गीतको आधारमा अभिनय उत्कृष्ठ रहेको अनुमान गर्न सकिन्छ ।
राजधानी मिडिया एड प्रोडक्सन र प्रिन्सेस मूभिजको व्यानरमा फिल्म निर्माण भएको छ । अर्जुन कुमार निर्माता रहेको फिल्मका कार्यकारी निर्माता भने माधव वाग्ले रहेका छन् । राजधानी मिडिया र प्रिन्सेस मूभिजले सिनेमालाई संयुक्तरुपमा प्रदर्शन गर्नेछन् ।
सिद्धार्थ पुडार्सनीले फिल्ममा निर्देशन गरेका छन् । यही फिल्मबाट उनले लेखन तथा निर्देशनमा डेव्यु समेत गरेका छन् । उनलाई फिल्मको कथा लेखनमा सरिष्मा खत्रीले सघाएकी छन् । प्रवीन खड्काको छायांकन र रोमी तन्डुकारको सम्पादन रहेको फिल्मको डिजिटल पाटर्नर म्युजिक नेपाल र क्रिएटिभ पाटर्नर टुनामुना कन्सेप्टको रहेको छ ।
चलचित्र बिदेशमा समेत प्रदर्शन अधिकार विक्रि भइरहेको बताइएको छ ।
