(Japan) 18 th March | 2025 | Tuesday | 5:04:57 AM || (Nepal) 1:49:57 AM
 
 


विश्वकप अघि नेपालले अमेरिका र क्यानडासँग खेल्ने, विनवार्डस् भोल्कानोसँगको सिरिज कब्जा

  POSTED ON : Friday, 17 May, 2024 | Views : 488

विश्वकप अघि नेपालले अमेरिका र क्यानडासँग खेल्ने, विनवार्डस् भोल्कानोसँगको सिरिज कब्जा


काठमाडौं, नेपाल ।

टि २० विश्वकप प्रतियोगिताको लागि तयारीमा रहेका नेपालले प्रतियोगिता अघि अमेरिका र क्यानडासँग वार्मअप म्याच खेल्ने भएको छ ।

हाल विनवार्डस् भोल्कानोसँग टि-२० सिरिज खेलिरहेको नेपालले बिहिबार दोस्रो खेलपनि ४९ रनले जित्दै सिरिज जितिसकेको छ ।

आईसीसीको खेल तालिका अनुसार नेपालले दुई एसोसिएट राष्ट्र अमेरिका र क्यानडा विरुद्ध वार्म अप खेल्ने भएको हो । आईसिसी टि-२० विश्वकप अघि नेपालले खेल्ने आधिकारिक वार्म-अप खेलको तालिका आईसीसीले बिहिबार अबेर सार्वजनिक गरेको छ ।

सार्वजनिक तालिका अनुसार नेपालले मे २७ मा क्यानडा विरुद्ध खेल्नेछ भने मे ३० मा अमेरिकाको सामना गर्नेछ । नेपालले दुवै खेल टेक्सासस्थित ग्रान्ड प्रेरी क्रिकेट स्टेडियममा खेल्नेछ ।

विश्वकप तयारीका लागि सेन्ट भिन्सेन्ट एण्ड द ग्रेनाडिन्स पुगेको नेपाली टोलीले विनवार्ड्स भोलक्यानोज विरुद्ध दोस्रो अभ्यास खेल खेलिसकेको छ भने तेस्रो खेल बाँकी छ । मे १८ मा सेन्ट भिन्सेन्टमा अन्तिम अभ्यास खेलसँगै नेपाल मे १९ मा ह्युस्टन प्रस्थान गर्नेछ ।

मे २२ र २३ मा नेपालले ह्युस्टनको प्रेरी भ्यु क्रिकेट कम्प्लेक्समा ह्युस्टन हरिकेनसँग अभ्यास खेल खेल्नेछ । नेपाल २५ मे मा डालास प्रस्थान गर्नेछ । जेठ २२ गते नेपालले नेदरल्याण्डसँगै खेल्दै विश्वकपको सुरुवात गर्नेछ ।