काठमाडौं, नेपाल ।
उपाधि भिडन्तमा श्रीलङ्कालाई १० विकेटको फराकिलो अन्तरले हराउँदै भारतले आठौँ एशिया कपको उपाधि जितेको छ ।
आइतवार कोलम्बोको आर प्रेमदासा रङ्गशालामा भएको फाइनल खेलमा श्रीलङ्काले टस जितेर पहिले ब्याटिङ रोजेको थियो।
श्रीलङ्का मात्र १५.२ ओभरमा ५० रन बनाएर अलआउट हुन पुगेको थियो ।
केवल ५१ रनको लक्ष्य पछ्याएको भारतले मात्र ६.१ ओभरमा कुनै पनि विकेट नगुमाइ लक्ष्य पूरा गर्यो ।
जितका लागि भारतका ओपनर ब्याटर ईशान किशन र सुभमन गिलले अविजित खेल्दै जीत दिलाए ।
श्रीलङ्काले टस जितेर पहिले ब्याटिङ गर्ने निर्णय गर्दा सायदै पहिलो चार ओभरमै आफ्नो टीमका आधा सदस्य प्याभिलियन फर्कनेछन् भन्ने सोचेको थियो ।
तर भारतीय बलरका तर्फबाट मोहम्मद सिराजले उत्कृष्ट बलिङ गरेर १६ बलमै श्रीलङ्काका पाँच ब्याट्सम्यानलाई आउट गरिदिए ।
खेलको १२औँ ओभरमा सिराजले छैटौँ विकेट पनि लिएका थिए ।
भारतीय बलरमध्ये मोहम्मद सिराजले सर्वाधिक ६ विकेट लिए ।
जसप्रित बुमराहले एक विकेट र हार्दिक पाण्ड्याले तीन विकेट लिए।
वर्षाका कारण फाइनल खेल सुरु हुन ढिलाइ भएको थियो ।
भारत र पाकिस्तानबीचको पहिलो खेल पनि वर्षाका कारण रद्द भएको थियो ।
भारत र पाकिस्तानबीचको दोस्रो खेल पनि ‘रिजर्भ डे’ राखिएका कारण मात्रै भएको थियो ।
