(Japan) 20 th May | 2022 | Friday | 3:12:49 AM || (Nepal) 11:57:49 PM
 
 

‘टोकियो विश्वको चौंथो सर्वाधिक महँगो शहर !’

  POSTED ON : Sunday, 17 October, 2021 | Views : 1824

‘टोकियो विश्वको चौंथो सर्वाधिक महँगो शहर !’


टोकियो, जापान ।

जीवनयापन खर्चसम्बन्धी एक सर्वेक्षण अनुसार जापानको राजधानीमा जीवन निर्वाह सस्तो भएको छ । मर्सरले गरेको सर्बेक्षण अनुसार विदेशी आप्रवासीका लागि टोकियो विश्वको चौथो सर्वाधिक महँगो शहरका रुपमा रहेको हो ।

गत वर्ष भने यो सूचिको तेस्रो स्थानमा रहेको थियो । यसै वर्षको शुरुमा जापान काम गर्नका लागि बसाई सर्न खोजिरहेका मानिसहरुको लागि विश्वको छैठौं रुचाइएको शहर बनेको थियो ।

मर्सरको पछिल्लो सर्वेक्षणअनुसार जापानका तीन मुख्य शहरहरु विदेशी आप्रवासीका लागि विश्वमै सबैभन्दा महँगो ४० शहरभित्र परेका छन् । विश्वको सबैभन्दा महँगो शहर तुर्कमेनिस्तानको आश्गाबात रहेको छ । दोस्रो र तेस्रो स्थानमा भने हङकङ र बेरुत छ । ओसाका सूचिको २३ औं स्थानमा रहेको छ भने नागोया ३४ औं स्थानमा छ ।

प्रतिवेदनमा विश्वभरका २०९ शहरलाई घरभाडा, यातायात, खाना र मनोरञ्जन लगायत सामान्य जीवनयापन खर्चका आधारमा सूचिकृत गरिएको छ । सर्वेक्षणमा न्यूयोर्कलाई आधार मानेर शहरहरुबीच तुलना गरिएको छ । सर्वेक्षणको उद्देश्य विदेशी कामदारलाई काममा राख्दा उपर्युक्त तलब उपलब्ध गराउन रोजगार दातालाई मद्दत गर्नु हो ।