टोकियो, जापान ।
जापानमा घरपरिवारहरुको खर्च घट्ने क्रमले जनवरीमा पनि निरन्तरता पाएको छ । एक वर्ष अघिको तुलनमा यो वर्षको जनवरीमा घरपरिवारहरुको खर्च शून्य दशमलव ३ प्रतिशतले घटेको सरकारी तथ्यांकले देखाएको छ ।
आन्तरिक मामिला तथा सञ्चार मन्त्रालयका अनुसार समीक्षा अवधिमा २ वा सो भन्दा धेरै जना भएको घरपरिवारले औसतमा ३ लाख १ हजार ६४६ येन खर्च गरेको छ ।
योसँगै खर्च लगातार तेस्रो महीना पनि घटेको छ । निजी खपत जापानको अर्थतन्त्रको मुख्य खम्बा हो । जीडीपीमा यसको अनुपात आधा भन्दा धेरै छ ।
निजी खपत सुस्ती प्रारम्भिक अनुमानको शून्य दशमलव ५ प्रतिशतबाट घटेर शून्य दशमलव ३ प्रतिशत आएको बताइएको छ ।
सुपरमार्केटदेखि अन्य पसलहरुसम्म मूल्य बढेर महँगी आकाशिएकै समयमा घरपरिवारको खर्च गर्ने शक्ति खुम्चिएको छ । त्यसमाथि ऊर्जाको भाउमा भएको वृद्धि र डलरको तुलनामा कमजोर येन पनि महँगी बढाएको छ ।
