(JAPAN) 18 th November | 2019 | Monday | 5:52:20 PM
(Nepal) 18 th November | 2019 | Monday | 2:37:20 PM
 

शक्तिशाली हागिबिस ताईफुबिच सिँगो बस्तीमा एक्लै बितेको त्यो रात !

  POSTED ON : Tuesday, 15 October, 2019 | Views : 971

शक्तिशाली हागिबिस ताईफुबिच सिँगो बस्तीमा एक्लै बितेको त्यो रात !


गत शनिवार र आईतबार जापानमा १९५८ सालपछि इतिहासकै ठुलो अनि बिनाशकारी ताइफु 'हागिबिस' आउने खबरले जापानी नागरिक र जापानमा रहेका बिदेशी नागरिकहरुलार्इ केहीदिन अघिदेखीनै त्रसित बनाएको थियो ।

जापानमा रहेका करिव ९० हजार नेपाली समुदायपनि ताइफु देखि डराउन थालिसकेका थिए । नभन्दै शुक्रबार मध्यरातबाटै जापानमा हागिबिस ताइफुले वितण्डा मच्चाउन सरु गरिहाल्यो ।

सामान्यतया धेरैजसो जापानबासी नेपालीहरु ताइफुसंग परिचित नै थिए तर हागिबिस ताइफु बिनाशकारी भनेपछि धेरै जना आत्तिएको र डराइरहेको अबस्था थियो ।

भर्खरै जापान आएका नेपालीहरुको त मुटुले ठाँउनै छाडेको अवस्था थियो भन्दा फरक नपर्ला ।

किनकि यहाँको भाषा, भुगोल, बिपदबाट कसरी बच्ने आदि कुराहरुको जानकारी राम्ररी नभएकालाई अरुलाई भन्दा धेरै समस्या पर्नु स्वाभाविक नै थियो ।

हागिबिसु ताइफुको असर शनिबार बिहानदेखि मध्य जापानमा पर्न थालिसकेको थियो । बिस्तारै बिस्तारै भारी बर्षा संगै हावाको बेगले तीब्ररुपमा गतिलिन थालिसकेको थियो । म बस्ने ठाउं टोक्यो एदोगावा कु ,कोइवा चारै तिर समुन्द्रले घेरिएको र नजिकै '१५मिनेट टाडा' एदोगावा नदीपनि रहेको छ ।

हावा र पानी गतिरोध हुन सकेन । साँच्चिकै आज हागिबिस ताइफुले टोक्यो डुबाउने भयो मेरो कोठा र नजिकको बस्तीहरु के सुरक्षित रहला रुआफैले आफैलाइ प्रश्न गरिरहे ,आफैले आफ्नै मनको डरलाइ नियन्त्रणमा लिने कोशिस गरे ।

काम गर्ने कम्पनिबाटपनि फोनआयो कम्पनिले रेल नचल्ने भएकोले बिदा बस्नु ,केयर गर्नु भनेर जानकारी दिएको थियो ।

साँझपख सम्म स्थिति सामान्यनै थियो तर नजिकै चिवा एरियामा ताइफुको प्रभाब बढ्दै गइरहेकोले बिद्युत प्रसारण बन्द गरिएको र ताइफुले निम्त्याएको क्षतिहरु भिडियोसहितका समाचारहरु नेपाली तथा जापानी समाचार संस्थाहरुले दिइरहेका थिए ।

केही बेरमा नजिकै रहेको खाचुसिका वडा कार्यालयले दिएको चेतावनीको सूचना अलर्ट म्यासेज मोबाइलमा बच्न थाल्यो । हतार हतार स्कृनसट गरी हेरे । पानीको बहाव बेढिरहेकोले घरको माथिल्लो तलामा नरहनु, खाचुसिका वडामा रहेको सेल्टरमा जानु भनेर पुर्व जानकारी दिइरहेको थियो ।

त्यो अलर्ट पटक पटक बज्न थालेपछि झनै डर लाग्न थाल्यो । कोठाको झ्याल खासै बलियो थिएन । सटरमात्र भैदिएपनि केही हदसम्म सुरक्षित होला भनेर सोचें ।

वरिपरि रहेका जापानिज छिमेकीहरु अघिनै कोठा छाडेर कुलेलाम ठोकिसकेकाले सुनसान थियो । म धेरैबेर झ्यालबाट चियाएर हेरे आफै बसेको वडा कार्यालय एदोगावाले पनि मोबाइलमा अलर्ट दिन थाल्यो ।

केहीबेरमा म बसेको अपार्टको मात्र बत्ती आउने जाने भयो । एक्लै छु कोठा छाडेर जाउ भारी बर्षा संगै ताइफुको झनै खतरा, साथीहरु भेट्न जाउ निस्पट्ट अँध्यारो अनि रेल पनि त चलेको थिएन ।

बेलुकी हुदै गएपछि ताइफुले टोक्योलाइ राम्ररी हल्लाइरहेको थियो ।कामले थकित ज्यान आरामपनि पुगेको थिएन अनि निद्गा पनि लागिरहेको थियो ।

ताइफुले पसल सुपा ,कम्बिनीहरु बन्द हुने भएकोले पाउरोटी र कप नुडल्स ल्याएर राखेको थिएँ ।

डराउदै थर्मसमा राखेको तातो पानी हालेर एक कप नुडल्स खाएँ । बत्ति गएकाले अँध्यारो कोठामा उभिएरै बसे । पानीका बाक्षिटाहरु झ्यालमा जोडले ठाक्किन थालेको थियो ।

समाचारहरुमा मध्य टोकियोलाइ क्षति पुराउन सक्ने भन्दै सचेत गराइरहेको थियो ।

मैले सुरुदेखि नै जापानको मिडियाहरु एनएचके, क्योदो, जापान टुडेले अपडेट गरेको लाइभ भिडियोहरु हेर्दै ताइफुबारे जानकारी लिने गरेको थिए ।

जापानमा रहनुभएका पत्रकारमित्रहरु बिशेषगरी राजन गौतम, गोकर्ण अधिकारी, आनन्द अधिकारी, शान्त पहरीले २४ सै घण्टा ताइफुको बारे अपडेटहरु दिइरहनुभएको थियो ।

त्यस्तै नेपाली इन जापानलेपनि राम्रो जानकारी तथा महत्वपुर्ण सुचनाहरु दिएर सहयोग पुराइरहेको थियो ।

उहाँहरुकै सहायतामा सुचना लिए । जापानको बिभिन्न केनहरुमा रहेका साथीहरुसंग कुराकानी पनी गर्न थालेँ । यसैक्रममा योकोहामा बस्नुहुने पुरानो मित्र एल.बि रुचालले अब ताइफु रोकियो । डराउनु पर्दैन भन्नुभएपछि आरामले सुते ।

तर चिवाको क्षति संगै ताइफुले कानागावा स्थित सिरोयामा ड्यामले बस्तीमा क्षति पुराउन सक्ने समाचार ,नागानो, इबाराकी, फुकुसिमाको डुवान, साइतामामा गएको पहिरो, मियाजाकी, तोचिकी लगाएत क्षेत्रमा परेको असरले दुखिद तुल्यायो ।

मैंले यी घटनाहरु सुन्दा र देख्दा जापान समृद्धी र बिकासले जति माथि पुगेको छ प्राकृतिक प्रकोपको रुपमा त्यतिनै ठगिएको छ भन्ने बुझाईलाई राम्रोसँग अनुभुती गर्न पाएं ।

डरलाग्दो भूकम्प, सुनामी, तार्इफुलार्इ जित्न जापानसंग मात्र होईन कुनैपनि देश वा कसैसँगपनि कुनै अस्त्र छैन  ।

तर जापान सरकारले जनताहरुलार्इ दिने राहत र सुचना लगायत संयन्त्र भने अत्यन्तै अनुकरणीय छ ।

यहाँ जतिनै ठुलो प्राकृतिक बिपत्ति आएपनि उद्दार टोली, दमकल, प्रहरी, एम्बुलेन्स तयारी अवस्थामा रहेको हुन्छ ।

हाम्रो देशलेपनि यस्ता महत्वपुर्ण कुराहरु बेलैमा सिको गर्न सकेको भए २०७२ सालको महभुकम्पबाट दशौ हजार नेपालीहरुले ज्यान गुमाउन पर्नेथिएन सायद ।

अन्तमा जापान सरकारले सुरक्षाका लागि बिभिन्न संयन्त्र अपनाए पनि हालसम्म करिव ६० जनाको मृत्यु मृत्यु, बेपत्ता र सयौको संख्यामा घाइते भएका छन् ।

ताइफुसँगै आएको वर्षाले गर्दा नदिहरुमा पानीको बहाव बढेसँगै शनिवार टोकियो महानगर क्षेत्र लगायत जापानका कयौं स्थानमा आवासीय क्षेत्रहरु डुबानमा परेको छ ।

कर्मभूमिको रुपमा रहिरहँदा यो देशले बिदेशी नागरिक भएरपनि हामीहरु प्रति निभाएको अभिभावकिय भूमिका, जिम्मेवारी बोध, सहयोग अनि नेपालको हितैसी मित्रदेश भएको नाता समेतले जापानलाई परेको यो बिपद्ध र भौतिक सहित मानविय क्षतीप्रती गहिरो सहानुभूति प्रकद गर्दछु । मृतकहरुमा हार्दिक श्रद्धान्जली, घाइतेहरुको सिघ्रउपचार र स्वास्थ्यलाभको कामना गर्दछु ।

फुर्वा शेर्पा-टोक्यो