(JAPAN) 19 th September | 2019 | Thursday | 5:16:38 PM
(Nepal) 19 th September | 2019 | Thursday | 2:01:38 PM
 

जापानमा पाँच दिनमा तीन नेपाली युवाको निधन, परदेशमा मृत्युले दिएको पिडा र बेदनाका कथाहरु

Gokarna Adhikari   POSTED ON : Saturday, 09 February, 2019 | Views : 1936

जापानमा पाँच दिनमा तीन नेपाली युवाको निधन, परदेशमा मृत्युले दिएको पिडा र बेदनाका कथाहरु


टोकियो ।

जापानमा पछिल्लो पाँच दिनमा तीन जना नेपाली युवाको निधन भएको छ ।

यसै साताको सोमबार देखी बिहिबार बिचमा तीन जना नेपालीको अल्पायुमै निधन हुन पुगेको हो ।

तिनजना मध्ये एकजनाको सडक दुर्घटना परि निधन भएको हो भने अन्य दुईको बिरामी अवस्थामा उपचारकै क्रममा निधन भएको हो ।


सडक दुर्घटनामा परि माईकलको निधन

सडक दुर्घटनामा परि जापानमा नेपाली युवाको निधन 

गसै हप्ताको सोमबार सडक दुर्घटनामा परि माईकल नामले चिनिएका बिजय गौचन थकालीको साईतामा केनमा गाडीको ठक्करबाट निधन भएको थियो ।

साईकलमा सवार गौचनले विद्यार्थी भिषामा जापान आएर केही समय अघिमात्र काम गर्ने भिषा परिवर्तन गरेका थिए ।

गत बर्ष नेपाल गएर बिवाह गरेका उनको सपरिवार काठमाडौंमा बसोबास गर्दै आएको छ । श्रीमतीलाई जापान ल्याउन भिषा प्रक्रिया अघि बढाईरहँदा गौचनको निधनले परिवारमा शोक र पत्नीमाथि पती बियोगसँगै बैवाहिक जिवनको अध्याय सुरु हुन नपाउँदै टुंगिन पुगेर बज्रपात पर्न गएको छ ।

गौचनको जापानमै दाहसंस्कार गरिने भएको छ । यसको तयारी भईरहेको बताईएको छ ।


स्वास्थ्य हेलचेक्राईंले २० बर्षको कलिलै उमेरमा सबिनले ज्यान गुमाए

दुखद समाचार-जापानमा २० बर्षिय सबिनको उपचारको क्रममा निधन 

चार बर्षअघि नेपालको माध्यमिक तह अध्ययन सकेर परिवारको साथमा बस्न बाग्लुगंका सविन क्षेत्री जापान आएका थिए ।

साईतामा केनमा आमा बुवा सहित परिवारको साथमा बस्दै आएका अर्बिन नामले चिनिने सविन केही साताअघिदेखी ईन्फ्लुएन्जाले बिरामी भएका थिए ।

सुरुमा सामान्य ईन्फ्लुएन्जा ठानेर मेडिकल स्टोरको सामान्य औषधि सेवन गर्दै आएका सविन झनपछि झन रोगले थलिन पुगे ।

एक होटलमा बेड मेकिगं काम गर्दै आएको बताईएका सविन काममा जानै नसक्नेगरि थलिएपछि अस्पताल उपचारको लागि पुगेका थिए ।

अस्पताल उपचारको लागि पुग्दा ईन्फ्लुएन्जाको असर सामान्य स्वास प्रस्वासमा नभई उनको फोक्सो सम्म पुगिसकेको रहेछ ।

उपचारमा सहयोग गर्नुभएका गल्कोट समा ज सम्वद्ध पदाधिकारीहरुका अनुसार सुरुमा स्वास्थ्यमा हेलचेक्राई गरिएकै कारण ढिलो गरि उपचार गर्न पुगेका सविनको फोक्सो ईन्फ्लुएन्जाको असरले काम गर्नै नसक्ने अवस्थामा पुगेपछि सघन कक्षमा राखेर उपचार थालिएको थियो ।

तर चिकित्सकहरुको भरमज्दुर प्रयासका बावजुत सबिन सामान्य ठानिने ईन्फ्लुएन्जाको अगाडी हार्न पुगे । २० बर्षको कलिलै उमेरका उनलाई चिकित्सकहरुले बुधवार मध्यरातको समयमा मृत घोषणा गरे ।

सुन्दर सपना सजाएर परिवारको साथमा आएका सविनको निधनमा परिवारले भविष्यको जीवन भरोसा ठानिएको सन्तान गुमाउन पुग्यो भने देशले एक भावी सन्तती ।


दिनेशलाई दैव लागेपछि सुत्केरी श्रीमतीलाई कसैगरि बचाउन सकेनन्

भावपूर्ण श्रद्धाञ्जली-सुत्केरी भएको महिना दिनमा नेपाली महिलाको जापानमा निधन

विद्यार्थीको रुपमा झण्डै ३ बर्ष जापानी भाषा विद्यालय अध्ययन सकेपछि म्याग्दीका दिनेश दर्जीले कमाईको बाटो पहिल्याउँदै कामगर्ने भिषा परिवर्तन गरेका थिए ।

परिवारको आर्थिक अभावलाई टार्दै प्रगतिपथमा सहारा बनाउन श्रीमती प्रमीला दर्जीलाईपनि जापान ल्याए ।

दुखका बिच खुशीको यात्रामा परिवारमा नयाँ सदस्य आउने भएपछि दर्जी परिवारमा खुशी छाएको थियो । तर दैवले देख्न नसकेको दिनेशको खुशीमा कालो बादल मात्र लागेन ठूलो सुनामी आईलाग्यो जब पत्नी प्रमिलालाई ब्रेन ट्युमर भएको खवर उनले थाहा पाए ।

आफ्नो गक्षले उपचार नभ्याउने भएपछि मनकारी जापानका सहयोगी नेपाली सहित मोना जापानको पहलमा सुत्केरी भएकी प्रमिलाको जीवन रक्षाको लागि आर्थिक संकलन भईरहँदा उनले भने बिहिबार साँझ संसार छाड्न पुगिन् ।

एक महिनाकी दुधे छोरीलाई छाडेर प्रमिला गएपछि पत्नि बियोगमा परेका दिनेशको एउटा सपनाको संसार त भत्कियो नै भएको जीवन संसारलाई कसरी सम्हाल्ने भन्ने पहाड अघि तेर्सिन पुगेको छ ।

आफ्नै जीवनको लडाई लडिरहेका दिनेशमा परिवारको जिम्मेवारी माथि प्रमिलाले चिनो छाडेर गएकी छोरी हुर्काउने कठिन परिक्षाको जिम्मेवारी समेत थप भएको छ ।