टोकियो, जापान ।
सार्वजनिक स्थानमा राखिएका टेलिफोन बूथ प्रयोग नगर्नुभएको कति भयो ? वा तपाईंले जापान आएपछि कहिल्यै यि सार्वजनिक फोन बुथ प्रयोग गर्नुभएको छ ? सायद कतिले अहिलेसम्म गर्नुनै भएको छैन होला भने गर्नुहुनेले पनि महिनौं वा बर्षौं भईसकेको हुनसक्छ यसको सदुपयोग नगर्नुभएको छ । जापान मात्र होईन यस्ता सार्वजनिक फोन बूथहरु हातेफोन अर्थात् मोबाईल आउनु अघि पे–फोन निकै उपयोगी थिए । यी बूथ सर्वव्यापी थिए भन्दा पनि हुन्छ ।
शहरी क्षेत्रमा हरेक ५०० वर्गमिटर र अन्य क्षेत्रमा हरेक एक किमिमा सार्वजनिक पे फोन बूथ जडान हुनु पर्छ भनेर वर्तमान नियमनमा नै उल्लेख गरिएको छ । अहिले जापानभर करीब १ लाख १० हजार पे फोन जडान छन् ।
तर विगत २० बर्षको तथ्यांक हर्ने हो भने पछिल्लो २ वर्षमा यिनीहरूको प्रयोग पहिला हुने गरेको भन्दा २ प्रतिशत पनि छैन । मानिसहरुको हातहातमा फोन छन् । यस्तोमा सार्वजनिक फोन बूथ प्रयोग बिहिन हुन थालेका छन् ।
वर्तमान परिस्थितिलाई दृष्टिगत गरेर सरकारले पे फोनको संख्या कम गर्ने अनि विद्यमान पे फोनहरूलाई आपतकालका बेलामा प्रयोग गरिने आश्रयस्थलहरूमा सार्नेबारे विचार गरिरहेको छ ।
यसबारे आन्तरिक मामिला तथा सञ्चार मन्त्रालयका र्योटा ताकेदाले सूचना तथा सञ्चार विभागसँग परामर्श गरेर निर्णय गर्ने बताइएको छ । निर्णय जुनसम्ममा हुने अनुमान छ ।
